Улуг-Хем кожууннуң Чааты сумузунуң кол кудумчузу – Шойдуң кудумчузун дургаар 2,5 километр орукту асфальт-биле шыварын доозуп турарын чагырга чери дыңнаткан. Орукту чаа школаже уламчылааш (280 метр), өөредилге чериниң чанынга машиналар тургузар черни база асфальт-биле шывар.
Орукту "ДСТ" кызыгаарлаан харыысалгалыг ниитилел май 12-ден эгелеп асфальтылап эгелээн. Чодураа суурну таварып эрткеш, улаштыр уругларның чайгы дыштанылга лагеринче баар орукту база септеп кылырынга ачы-дузазын көргүскенинге кожууннуң удуртулгазы, өөредилге эргелели, Чааты сумунуң чону четтиргенин илереткен. Эрес-кежээ орукчуларның шалыпкын ажылдап турарын улус эскерип, оларның ажыл-ижин мактап турар.
Чурттакчы чону эвээш-даа болза демниг, ажыл-ишчи Чааты сумузу сөөлгү каш чылдарда чаартылгалар элээн хөй. Клубтуң үндезин септелгезин чоруткан, фельдшер-акушер пунктузун база ангар хевирниң спорт залын туткан. Ол ышкаш чаа школаның тудуу доостурунуң кырында келген.