Улуг-Хем кожууннуң Чаатының тараажызы Ахмед Дадар-оол чыжыргана өзүмнерин тарып олуртканын чагырга чери дыңнаткан.
Чер ажылынга элээн дуржулгалыг апарган аратка өг-бүлези, дөргүл-төрели болгаш чаатыжылар дузалажып турар. Чааты школазының улуг класстары башкылары-биле эртенги шакта өөренгеш, дүъш соонда алдын сарыг каттарның өзүмнерин улуг сонуургал-биле тарып, дузазын көргүскен.
Ахмед Дадар-оол Чаатының эки чемишчидилгелиг, суггаттыг шөлүнге чылдың-на картофелин, тараазын тарып өстүрүп турар арат каңдаашкынныг чылдарда безин багай эвес дүжүттү ажаап ап келген. Бо чылын тараан картофелинден 80 тонна дүжүттү ажаап алган. Чер ажылдыг арат сөөлгү чылдарда чүгле тараа, картофель эвес, кат-чимис өстүрерин база бодап турган. Ооң күзели бүткени ол.
Тываның Көдээ ажыл-агый яамызы Барнаул хоорайда кат-чимис өстүрүп турар черден өзүмнерни садып алыр керээни чарган турган. Тени эвээш, улуг каттыг чыжыргананың аңгы-аңгы сорттарының өзүмнерин 20 муң дөстү, Бийск районда Лебяжье суурдан 10 муң дөстү ийи сая 600 муң рубльге саткан.
Өзүмнер тараан улуг шөлдү долгандыр мал-маган кирбес кылдыр херимнээри чугула. Ахмед Дадар-оолдуң оглу, күдээзи ыяш сөөртүп, адагаштарын тургузуп эгелей берген.
