Тывада 2026 чылдың чайгы кадыкшылга кампаниязынга белеткел ажылдары республикада уламчылавышаан. ТР-ниң Өөредилге яамызының дыңнатканы-биле алырга, республиканың шупту школачыларының 26 хуузун, азы 18808 уругну чайгы үеде дыштанылга болгаш кадыкшылга хемчеглеринче хаара тудары планнаттынган.
Чайгы кампанияга белеткел ажылдары төнчү чадазынче кирген: лагерьниң септелгези доозулгалак, айыыл чок чорук айтырыгларын хынап, дыштанылга программаларын ажылдап кылган.
Бо чайын Тывага ниитизи-биле 183 уруглар лагери ажылдаар, оларның аразында школа чанының, стационар лагерьлер, майгын база күш-ажыл болгаш дыштанылга лагерьлери бар. Оларның хөй кезии июнь эгезинде ажыттынар. Уругларны спортчу, чогаадыкчы, өөредиглиг, ада-чуртчу сменалар манап турар.
Республикада уруглар дыштанылгазының инфратургузуун ам-даа чаартып турарын демдеглезе чогуур. Бо чылын Улуг-Хемниң «Чодураа» болгаш Тес-Хемниң «Сайлык» лагерлерин эде чаартып турар. Мооң мурнунда Ак-Довуракта «Таежный» лагериниң чемненир черин болгаш эмнелге пунктузун чаарткан. «Аныяктар болгаш уруглар» национал төлевилелдиң «Уругларга бүгү-ле экини» федералдыг төлевилелиниң ачызында чайгы кадыкшылга лагериниң инфратургузуун чаарткан.
Тываның Улустуң башкызы Петр Морозов аттыг аграрлыг лицейге ажыттынар «Ногаан делегей» стационар лагери – бо чайын ажылдаар чаа объектилерниң бирээзи. Оон аңгыда Кызылда, Каа-Хемде, Сукпакта, Хову-Аксыда чеди чаа школа лагерьлери бо чайын ажылын эгелээр.
Уругларның айыыл чок чоруунче онза кичээнгейни угландырган. Шупту лагерьлер ажыдыышкын мурнунда санитарлыг база өртке удур айыыл чок чоруктуң хыналдаларын, ажылдакчылар белеткелди эртер. Арга-арыг чоогунда болгаш арга-арыг өрттериниң айыылынга таваржып болгу дег черде лагерьлер тускай хыналдада.
Бо чайын Тываның уруглары чүгле республика иштинге эвес, а оон дашкаар база дыштанырлар. Бүгү-россияның «Артек», «Океан», «Орленок», «Смена», «Алые паруса» уруглар төптеринге 100 хире школачы дыштаныр. База 850 уруг санаторлуг-курорт эмнээшкинин алыр.
Тускай шериг операциязының киржикчилериниң ажы-төлүн, хөй ажы-төлдүг болгаш эвээш орулгалыг өг-бүлелерниң ажы-төлүн, амыдыралдың нарын байдалынга таварышкан өг-бүлелерниң ажы-төлүн деткииринче онза кичээнгейни салыр. Оларга халас путевкалар болгаш немелде деткимче хемчеглери көрдүнген.
