Чайгы дыштанылга лагерьлеринче путевкаларны тускайлаан

Тывада тускай шериг операциязының киржикчилериниң ажы-төлүнге хоорайдан дашкаар дыштанылга лагерилеринче путевкаларны тускайлаан.

Тываның Күш-ажыл болгаш социал политика яамызы хөй ажы-төлдүг болгаш амыдыралдың берге байдалынга таварышкан өг-бүлелерниң ажы-төлүнге, даңзыда турар назы четпээннерге чайгы дыштанылга лагерьлеринче путевкаларны тускайлаан.

Тываның Баштыңы Владислав Ховалыгның даалгазы езугаар, албан чери тускай шериг операциязының киржикчилериниң ажы-төлүнге кадыкшылга дыштанылгазын организастаар. Республика эрге-чагыргазының детикимчези-биле ачалары фронтуда 459 оолдар болгаш уруглар «Байлак», «Бельбей», «Орлёнок» база «Чагытай» лагерьлеринге дыштанырлар.

ТР-ниң Күш-ажыл яамызының удуртулгазынга ийи лагерь: Мөңгүн-Тайга кожуунда «Менги чечээ» биле Таңдыда «Байлак» лагерьлери тус-тузунда 50 биле 232 олутту тускайлаан. Албан чери чылдың-на чиигелделиг өг-бүлелерниң ажы-төлүнге, өскүс уругларга, кадыкшылының байдалы-биле харык-шинээ кызыгаарлыг уругларга, социал айыылдыг байдалда уругларга путевкаларны немей садып ап турар. Бо чайын 870 оолдар, уругларны чиигелделиг путевкалар-биле дыштандырар.

Оон аңгыда, тускай шериг операциязында долу эвес мөөңнээшкинче кыйгырткан болгаш эки турачыларның, “Вагнер” хууда шериг компаниязының шериглериниң ажы-төлүнге «Байлак», «Бельбей», «Орлёнок» база «Чагытай» дыштанылга лагерьлеринче 459 путевканы үлээрин күш-ажыл сайыдының оралакчызы Чечена Дудуп дыңнаткан. Уруглар лагерьлерге июньнуң 15-тен эеглеп, үш сезонда кадыкшылын быжыктырып дыштанырлар.

Күш-ажыл яамызының шугумунда стационар лагерьлерден аңгыда, Өг-бүлеге болгаш уругларга социал дуза төптериниң баазазында хүндүскү лагерьлерге уруглар дыштаныр. Күш-ажыл яамызының шак ындыг албан чериниң төптери республиканың муниципалдыг тургузугларында ажылдап турар.

Хүндүскү лагерьге уруглар 8.00 шактан 16.00 шакка чедир хүнзээр. Хүндүскү лагерьже хөй ажы-төлдүг болгаш эвээш орулгалыг өг-бүлелерден уругларны бирги ээлчегде хүлээр. Күш-ажыл яамызының шугуму-биле чиигелделиг бөлүкте кирип турар 2498 уруг чайгы лагерьлерге дыштанырлар.