Кызылда президентиниң кадет училищезиниң 10-гу классчыларынга чайгы практика үезинде солун хемчеглер организастаттынганын республиканың немелде өөредилге сайзырадыр төвү дыңнаткан.
Тываның билдингир артизи Айдыс Салчак кадеттер-биле ужуражып, «Чугаала» деп өөредигни эрттирген. Уруглар ораторнуң уран аргазынга болгаш бодунуң бодалдарын аудиторияга чедимчелиг чугаалаарын өөренгеннер. Кадеттер боттарын таныштырып, чедиишкиннерин болгаш сорулгаларын чугаалап турганнар.
Айдыс Салчак уругларга сөзүглелдерден рольдар, режиссёрнуң бодалдары база актернуң маадыры төрүттүнүп келирин база үннүң аянындан, шимчээшкиннерден артист кижиниң долузу-биле хуула бээрин тайылбырлаан.
Хемчег кулинария кабинединге уламчылаан. Аңаа кулинарияның мергежилинге база чемненириниң этикединге хамаарышкан кичээл эрткен. Кадет уруглар командаларга чарлып алгаш, янзы-бүрү чемниг пирогтарны быжырганнар. Команда бүрүзү чүгле чаагай чемни эвес, а гастрономия шедеврин белеткээрин кызыткан.
