Чөөн-Хемчик кожууннуң Чыргакы, Хөндергей сумуларының социал ажылдакчылары “Айыыл чок чай” деп акцияның чорудуу-биле малчын аалдарны кезип, ажык хөөлбектерни хынап чорутканын чагырга чери дыңнаткан.
Ниитизи-биле назы четпээн уруглар дыштанып турар үш малчын турлагга чедип, чайлагларга уруг-дарыгның дыштанылгазын амыр-менди эрттирер талазы-биле тайылбыр ажылын чорутканнар. Ында он назы четпээн уруг дыштанып турар.
Улуг кичээнгейни уругларның хемнерге эштиринче сагыш салырынче, аът-хөл-биле оваарымчалыг болурунче олар угландырган. Ол ышкаш Ак-Хемниң эриинде “Эштип болбас” деп сагындырыглыг демдекти тургускан.
Чайгы дыштанылгазының үезинде уруглар болгаш оолдарның амыр-менди ойнап-хөглээринче, озал-ондакка таварышпазынче улуг кичээнгейни кожууннарның эрге-чагыргалары салып турар.
Малчын аалдарже тайылбыр ажылдыг үнүүшкүннерни ам-даа уламчылаар.
