Казань хоорайга чалыы армейжилер шимчээшкининиң удуртукчуларының болгаш дагдыныкчыларының хуралы болуп эрткенин республиканың немелде өөредилге сайзырадыр төвү дыңнаткан. Аңаа 2025 чылдың ажыл-чорудулгазын түңневишаан, келир чылдың планын сайгарып чугаалашкан.
Чурттуң аңгы-аңгы булуңнарындан 100 ажыг киржикчи шериг-ада-чуртчу кижизидилге база шимчээшкинни хөгжүдериниң талазы-биле ажыктыг арга-дуржулганы солушкан. Элээдилер өөредиглиг шөлчүгештерге, чалыы армейжилерниң нормативин күүседиринге, аңгы-аңгы мастер-класстар болгаш экскурсияларга киришкен.
Хемчегниң байырлыг кезээнде Тываның “Чалыы армия” хөй-ниити шимчээшкининиң регионалдыг штавының удуртукчузу Айдын Шивидекке РФ-тиң Чепсектиг Күштериниң мурнунда салдынган сорулгаларын шиитпирлээринге киирип чоруур үлүг-хуузу дээш чурттуң Камгалал яамызының Өөрүп четтириишкин бижиин тывыскан.
– Регионнардан келген иштежилерим-биле ужуражылга үезинде уруглар-биле сырый ажылдаары база дагдыныкчы кижиниң үре-түңнелдиг ажылының дугайында айтырыгларны чугаалашканывыс үнелиг болду. Ол дээрге-ле чалыы армейжилер шимчээшкининиң хөгжүлдезиниң кол барымдаазы болур. Моон-даа соңгаар оолдар, уругларның белеткелин бедик деңнелче үндүрүп, лидер шынарларын сайзырадып, хамааты туружун быжыглавышаан, харыысалгалыг болурун чедип алыр бис деп бүзүрээр мен – деп, Айдын Шивидек демдеглээн.
Тывада «Чалыы армейжилер» шимчээшкининиң одуруунче кирер күзелдиг уруглар, оолдарның саны чылдан чылче немежип турар. Бо хүнде оларның саны 8000 кижи четкен.
