Ыраккы Кызыл-Хая суурнуң культура бажыңының чанында «Кады бис» штабтың эки турачыларының киржилгези-биле «Чалыы сарлыкчының школазынга» практиктиг кичээлдер болганын культура албан чери дыңнаткан.
6 «а» класстың өөреникчилери хоочун малчыннар Алексей Шириненович биле Марита Ивановнаның аалынга четкен. Олар сарлыктарны одарже үндүрер бетинде, 20 литр сүттү саап алганнар. Улаштыр малчын коданның девискээрин аштап арыглаан. Уруглар хураганнар акталаарынга база киришкен. Эки турачылар малчыннарга аът дагалаарынга, чээрген чыырынга дузазын көргүскен.
«Чалыы сарлыкчының школазының» уруглары хүндүлээчел малчыннарның аалынче катап келир күзелин илереткен.
Төлевилелдиң кол сорулгазы – ажы-төлдүң көдээ ажыл-агыйга сонуургалын оттуруп, ону амыдыралынга ажыглап билиринге чаңчыктырары болгаш сарлык малдың онзагайын уругларга таныштырып, ооң сүдү, эъди, кежи, дүгүнден янзы-бүрү кылыгларны кылып өөредири.
«Чалыы сарлыкчының школазы» төлевилелдиӊ кол партнеру – Россия Федерациязыныӊ болгаш Тыва Республиканыӊ көдээ ажыл-агыйыныӊ алдарлыг ажылдакчызы, Күш-ажылдыӊ маадыры, «Мөген-Бүрен» кызыгаарлаан харыысалгалыг ниитилелдиң директору Өшкү-Саар Ооржак.
Мөген-Бүрен ортумак школазының ада-ие комитеди Бүгү-россияның ада-иелер каттыжылгаларының эгелекчи саналдарын деткиир мөөрейге "Чалыы сарлыкчының школазы" төлевилели-биле тиилээш, грант деткимчезин алганын сагындыраал.
