Тываның Наадым байырлалынын 2022-2023 чылдарда ийи дакпыр тиилекчизи Арбай Саттың «Тыва Республиканың чаш Арзылаң мөгези» деп хүндүлүг атты алганын байырлап, эш-өөрү, төрел-чону-биле кежиин үлешкен найыры болуп эрткен.
Чаш Арзылаңның найырынга республиканын аңгы-аңгы булуңнарындан 250 хире чаш болгаш элээди мөге аалдап келген. Сүт-Хөл кожууннуң удурттулгазы Чаш Арзылаңның чедиишкиннеринге өөрүп, мөгениң сүлдезин көдүрүп, Күчүтен атка чедир хүрежип, Тыва Республиканың төөгүзүнге балалбас исти арттырар алдарлыг мөге болуп өзерин күзээш, чугурук богбаны белек кылдыр сөңнээн.
Ол ышкаш кандыг-даа спортчунуң эн кол чөленгиижи тренер башкызы болурун демдеглээш, Арбайның ачазы Амир Сатка, төлептиг оолду кижизидип өстүргенинге чоргаарланып, ооң Сүт-Хөл кожууннуң адын камгалап, хөй-хөй хүрештерге тиилелгелиг черлерни ээлеп чораанын барымдаалааш «Кожууннуң Арзылаң мөгези» деп атты тывыскан.
Арбай Сат – Хөр-Тайга ортумак школазының дөрткү клазының өөреникчизи. Ол аныяк өг-бүлениң ийи дугаар оглу.
Бичии мөгениң чедиишкиннерин демдеглеп, чангыс чер-чурттуглары болгаш тыва хүрештиң бичии мөгейикчилери-биле кежиин үлешкен чараш байырлалды ада-иези, төрелдери эрттирген.
Хүреш маргылдаазы назы-хар аайы-биле беш аңгы чардынган бөлуктерге болуп эрткен.
2016-2017 чылдың мөгелериниң аразынга бирги черни Сүт-Хөлден Сугдер Донгак, 2014-2015 чылдың мөгелериниң аразынга бирги черни
Бай-Тайга Долаан Шойдан, 2012-2013 чылдың мөгелериниң аразынга бирги черни Эрзинден Аюш Середар, 2010-2011 чылдың мөгелериниң аразынга бирги черни Чөөн-Хемчиктен Айслан Донгак, 2008-2009 чылдың мөгелериниң аразынга бирги черни Кызылдан Давид Сендель олар чаалап алганнар.
