Өзүп орар салгалдың мөзү-шынарның, буянныг үүлениң чаңчылчаан үнелиг чүүлдерин, бергелерни ажып эртер аргаларын тургузар сорулга-биле Тывада «Чаш назынның навигаторлары» федералдыг төлевилелдиң киржикчилери «Школаларда кинокичээлдер» болгаш «Бүгү Россияның уругларның кинопремьералары» деп төлевилелдерни боттандырып эгелээнин ТР-ниң Өөредилге яамызы дыңнаткан.
Кинокичээлдиң ийиги кезээнда кинону көрген соонда, мөзү-шынар билиишкинин быжыглаары-биле сайгаржып чугаалажыр болгаш хөй-ниити-ажыктыг ажыл болур.
Кино санында башкыга дуза кылдыр методиктиг ном бар. Чижээлээрге, уруглар директорнуң кижизидилге талазы-биле чөвүлекчизи-биле кады ада-иелер-биле нарын харылзааларның дугайында кинону көрген. Ооң соонда уруглар боттарының бодалдарын болгаш маадырга хамаарылгазын илередип сайгарылганы чорудар. Улаштыр даалгалар алыр – шупту кады ада-иелерге белектер кылыр азы ада-иези-биле чурукка тырттырар деп даалга алыр.
Бир дугаар кино кылдыр «Звезды укажут мне путь» деп күзел, чогаадылга, харылзаа дугайында кино болган. Төлевилелге эң-не идепкейлиг киржилгелиг болган Чөөн-Хемчик кожууннуң Чадаананың 1 дугаар школазының «Окно в кино» киноклувун, 2 дугаар школаның «Виртуоз» киноклувун, Хайыракан суурнуң «Дамырак» база Бажын-Алаак суурнуң школазының «Хрустальное кино» болгаш өске киноклубтарын демдеглеп болур.
