Национал школа хөгжүдер институттуң «Чаштарга эртем» төлевилелин боттандырып турар хемчеглер-биле чергелештир институттуң тыва филология лабораториязының методизи Аянмаа Салчак Бай-Тайга кожууннуң Кызыл-Дагның Х.А. Анчимаа-Тока аттыг ортумак школазының орус дыл, литература башкызы болгаш логопед Ольга Кужугет-биле кадыкшылының байдалы кызыгаарлыг уругларга ажыл чорудулга талазы-биле чугаалашкан.
Бо школада уругларның кадыкшылының аайы-биле харык-шинээнге таарыштыр дериттинген тускай кабинет бары онзагай болган. Кемниг уруглар чеже-даа кадыкшылының байдалы-биле чамдык кызыгаарлаашкыннарга таваржып турза, оларда дөмей-ле бойдустан салым-чаяаны илереттинип келирин бо дуржулгалыг башкының ажылындан көрүп болур. Чижээлээрге дүк-биле кылыр ажылдарга Янджимаа Догбалдың ус-шевери илерээн, уран чурулгага салым-чаяанныг Лилия Салчактың чураан чуруктарын делгелге кылдыр дерип аскан.
