Сүт-Хөл кожууннуң чагырга даргазы Орлан Монгуш часкы хову ажылдарын организастыг чорудар талазы-биле доктаалды хүлээп алганын дыңнаткан.
– Көдээ ажыл-агый эргелелиниң ажылдакчылары, суму чагыргаларының даргалары тургустунган штабтың ажылында киржип, ажылчын хуралдарны доктаамал эрттирип турар.
Кол суг бадар бугалар дөстерин дүрген суг бадырар сорулга-биле хөмүр-даш хүлү төгер ажылдарны чоруткан. Үрезин алыр, кывар-чаар материалдар садып алыр керээлер чардынган.
Сугну дүрген бадырар, тараа, сиген шөлдеринге база бажыңнарның огородтарынга чедирерде, кургаг ыяштарны аштаары чугула болуп турар. Бо талазы-биле шөлдер ээлеринге болгаш сумуларның чагырга даргаларынга чогуур даалгаларны штаб мурундан дааскан.
Ниити бугалар дөстериниң суг бадырар байдалы нарын. Улуг септелге ажылдары негеттинип турар. Суггарылга бугаларын септээр, катап тургузар куруне программазынга киржири-биле тускай дөзевилел тургузар турскай мергежилдигни чалап алгаш, Ак бугаларын көргүзүп, хемчээп, дугуржулга ажылдарын кылдывыс.
Чоннуң кичээнгейинге: Тараа, ногаа, огород, суггат ажылдарының талазы-биле айтырыгларны чурттап турарынар сумуларының даргаларынга тургузуп, кады ажылдажылганы чорударын диледивис.
