Сүт-Хөл кожууннуң Черлиг-оол Куулар аттыг төп ном саңынга Россия Федерациязының культуразының алдарлыг ажылдакчызы, Тываның Улустуң чогаалчызы Артык Ховалыгның 75 харлаанын уткуштур “Мээң ырым хомус ышкаш онза ырлыг” деп кожуун чергелиг чечен чогаал номчулгаларының хүннери болуп эрткенин ном саңы дыңнаткан.
Онлайн хевирге эрткен уран номчулгага школачылар болгаш улуг улус идепкейлиг киришкен.
Бирги черге Суг-Аксы ортумак школазының онгу классчызы Лияна Күжүгет төлептиг болган. Ийиги черни Хөр-Тайга ортумак школазының онгу классчызы Ян Кара-оол, үшкү черни Кара-Чыраа ортумак школазының сески классчызы Алдын-Херел Кыргыс болгаш Ак-Даш ортумак школазының тоску классчызы Яна Ховалыг алган.
Улуг киржикчилер аразынга “Уран номчулганың тускай диплому” шаңнал бижикке Хөр-Тайга ортумак школазының башкызы Марина Ооржак төлептиг болган. Арткан киржикчилер “Уран номчулганың нептередикчизи”, “Уран номчулганың чалыы киржикчизи” деп тускай шаңналдарны алган.
Төп ном саңының удуртулгазы шылгарааннарга шаңнал бижиктерден аңгыда өртектиг белектерни тывыскан.
Суг-Аксы сумузунуң хоочун чурттакчылары С.Н. Очур-оол, А.К. Сарыглар чалыы киржикчилерни деткип, уран номчулгага изиг күзелдии-биле киришкен.
