Тыва үндезин культура төвү сураглыг авар чогаалчы, прозачы, публицист, очулдурукчу Расул Гамзатовтуң 100 харлаан оюнга база Тыва дыл хүнүнге тураскааткан республика чергелиг «Тыным болган тыва дылым» деп очулга мөөрейин эрттиргенин төп дыңнаткан.
Жюри кежигүннериниң саналы-биле тергиин болган авторларның аразында Чечена Монгуш Расул Гамзатовтуң чогаалдарын бедик деңнелге очулдуруп, авар чогаалчының шүлүктериниң уран-чечен дылын долузу-биле дамчыдып шыдапкан.
Ынакшылды аңгы чурт деп адаксадым
''Ынакшыл -ол черде эң-не бедик чүүл'' деп,
Ыдык ыры бо сөстерден эгелей бээр,
Ынакшылды аңгы чурт деп адаксадым,
Ында шупту тайбың, чылыг чурттаар кылдыр.
Ыдык ырны туруп алгаш ырлаар кылдыр,
Ырак дээрже шак ол ыры ужар кылдыр,
Ынакшыл деп чуртуң сүлде демдээ кылдыр
Быжыг туткан ийи холдар турар кылдыр.
Өндүр күш-даа, шыдал чогу, чарлыышкын-даа,
Өөрүшкү, кударал-даа ында сиңген,
Өртемчейниң бүгү каазы көстүп турар
Өңгүр тукту тургузарын күзеп тур мен,
Хамык чонум Ынакшыл деп чурттан кээп-ле
Камгалалды дилезин деп күзээр-дир мен.
Расул Гамзатов – Дагестанның ада-чуртчу оглу, бедик мөзү-шынарлыг, төрээн чериниң чаныш-сыныш чок кижилерниң бирээзи. Ховар дээн салым-чаяанныг чогаалчы чонунга чечен сөзүн өргүп, төрээн дылының, культуразының, чуртунуң сайзыралынга чаагай үлүүн киирген. Ооң чогаадыкчы өнчүзү салгалдар аразында харылзааны магадылап, ак сагыш, шынчы база төрээн чуртунга ынак чорукту алгап, чуртталганың кол өзээ ынакшылды болгаш найыралды карак огу дег хумагалаарын суртаалдап чоруур.
