“Таңды-Уула” көдээ культура бажыңынга тускай шериг операциязының киржикчилери 18 харга чедир оолдар аразынга "Чеди-Хөлдүң кашпагайы" деп чаңчыл болган хүреш маргылдаазын эрттиргенин чагырга чери дыңнаткан.
Чеди-Хөл кожуундан дайынчы оолдар Луганск болгаш Донецк улус республикаларга, Херсон болгаш Запорожье областарынга Ада-чурттувусту неонацист, террорист дайзыннардан камгалап тургаш маадырлыы-биле чок болган эштеринге тураскааткан хүреш маргылдаазынга 121 мөге киришкен.
Тергиин мөгелер санынче Ак-Талдан Сайын Сүктер-оол, Сайлыгдан Ай-Херел Ооржак, Элегестен Начын Иргит, Сайлыгдан Кудерек Тюлюш олар кирген.
2016-2017 чылдарда төрүттүнген оолдар аразынга Кайгал Маскыр (Ак-Тал), 2014-2015 чылдарда төрүттүнген оолдар аразынга Сайын Оюн (Элегес), 2012-2013 чылдарда төрүттүнген оолдар аразынга Чимит-Доржу Тюлюш (Хову-Аксы), 2010-2011 чылдарда төрүттүнген оолдар аразынга Темуджин Тарасов (Ак-Тал), 2007-2008-2009 чылдарда төрүттүнген оолдар аразынга Шоваа Докан-оол (Хову-Аксы) бирги черни чаалап алганнар.
Назы-хар аайы-биле «Чараш девиг», «Чараш арга» шаңналга төлептиг болганнарны база шаңнап-мактаан.
Салым-чаяанныг чурукчу Радомир Балганныӊ ажылдарының делгелгези база болган.
ТР-ниң Чазак Даргазының оралакчызы Орлан Сарыглар, кожууннуң удуртулгазы маргылдаага хүрежип келген оолдарга, кожуундан тускай шериг операциязында киржип турар дайынчыларга, деткикчилерге четтиргенин илереткен.
