Бии-Хем кожууннуң Турандан тускай шериг операциязының киржикчизи Чаян Белекпенниң чырык адынга тураскааткан республика чергелиг хүреш маргылдаазы болуп эрткенин чагырга чери дыңнаткан.
Кожууннуң чагырга даргазының хүлээлгезин күүседип турар Алдай-Мерген Ховалыг хүрешке ырак-чооктан киржип келген мөгелерге чедиишкиннерни күзээн.
Маргылдаага республиканың аңгы-аңгы кожууннарындан күрүне чергелиг ат чок 64 шыырак мөге киришкен. Олар тыва хүрештиң аарыкчыларын, бии-хемчилерни өөртүп, чараш маргылдааны көргүскен.
Таңды кожууннуң аныяк мөгези Мерген Монгуш шүүлген (шаңналы 100 000 акша), ооң чаңгыс чер чуртуу Тайлун Оюн үжүүрлешкен (шаңналы 50 000 акша). 3-4-кү шаңналдыг черлерде Сүт-Хөл кожуундан Артыш Ооржак биле Чөөн-Хемчиктиң мөгези Орлан Монгуш (шаңналдары 25 000 акшалар).
Донецкиде шериг албан-хүлээлгелиглерни деткиир Чаңгыс аай дүүштүрүлге төвүнүң удуртукчузу Владислав Маады Чаян Белекпенниң ада-иезинге байыр чедирген.
Ч.Э. Белекпен хөй ажы-төлдүг өг-бүлеге төрүттүнген. Ол школаны Туран хоорайга дооскан. Тускай шериг операциязының маадыры спортка сундулуг, биче сеткилдиг, дидим чүректиг, улугну улуг деп, бичени биче деп хүндүлеп билир чораан. Ол 20 харлыында тускай шериг операциязының девискээринге дайынчы даалгаларын күүседип тургаш, кезээ мөңгеде чырык өртемчейден чарлып чоруткан.
Кол эттирикчилер болгаш деткикчилер – Маадырның ада-иези Эдуард Николаевич биле Людмила Кара-ооловна болгаш чоок кижилери.
