Сүт-Хөл кожууннуң уругларның үлегер-майыктың ном саңында ажыттынган «Челээш» түр үениң дыштанылга төвүнде школачыларга аңгы-аңгы хемчеглерни эрттирип турарын ном саңы дыңнаткан.
Бо удаада библиотекарьлар уругларга Чаа чыл байырлалының төөгүзүн болгаш чаңчылдарын таныштырган. Улаштыр олар викторинага болгаш хөглүг оюннарга киришкен.
Тывада узун байырлалдар хүннеринде түр үениң 340 дыштанылга төвү ажылдап турар. ТР-ниң Өөредилге яамызының дыңнатканы-биле алырга, декабрьның 31-ден январь 11-ге чедир кышкы дыштанылга хүннеринде төптер ажылдаар. 18,5 муң ажыг уругну аңгы-аңгы хемчеглерге хаара тудар.
Дыштанылга хүннеринде организастаан хемчеглер программазы эрткен чылдыындан дөрт катап хөй. Ол уругларга байырлалдарны ажыктыг эрттиреринге, чаа улдуңга белеткенип, салым-чаяанын ажыдып, чаа мергежилдерни чедип алырынга дузалаар.
Өөредилге албан черлериниң төлээлери мындыг хевирлиг дыштанылга уругларны чүгле хаара тударындан аңгыда, оларга бот-сайзыраар, бодалдарын боттандырар арганы берип, эш-өөрүнүң аразынга солун кылдыр хөглеп, үшкү узун улдуң эгелээриниң мурнунда таптыг дыштанып алыр арганы бээр деп демдеглээн.
Ол ышкаш январь 11-ге чедир уругларның айыыл чок чоруун хандырар дээш, «Айыыл чок Чаа чыл» деп албан черлер аразының профилактиктиг операциязын чорудуп турар.
