Чылдың-на Улуг-Хем кожууннуң Арыг-Бажы, Сенек, Калбак-Хады девискээринге арга-арыг ажыл-агыйын таварыштыр федералдыг программа-биле хады өзүмнерин чагыг аайы-биле тарып олуртур ажыл чоруп турарын чагырга чери дыңнаткан.
Арыг-Бажының чону тарылга ажылынга чылдың-на киржип турар. Он-он чылдарның дургузунда оларны удуртуп келген бригадир Владислав Дамбый бо чылын база ажыл чок чонну эвилелдеп, бригада тургузуп алгаш, хады өзүмнерин тарып эгелээн.
Федералдыг чагыг езугаар арга-арыг ажыл-агыйы-биле керээ чаргаш, Арыг-Бажының девискээринге хамааржыр Чиңге-Даг артында «Балдаң чурту» деп черде 10 ажыг гектарда өзүмнерни тарып олурткан. Ниити тарыыр шөлү 56 гектар. Ону каш хонук дургузунда доозар планныг.
Бригадада 16 кижи хаара туттунган. Айлаң Кыргыс оларга дүъштеки чемни кылып берип турар. Субудай Сереп хүннүң-не эртенгиниң 8.00 шактан кежээ 19.00 шакка чедир ажылдаан чонну хуузунда машиназы-биле аай-дедир чедирип турар.
Өзүмнерни анаа-ла дужа-келбиже тарывас, аразының хемчээлин сагыыр болгаш тускай хүүректерлиг черни базар, өзүмнү киир тарыптар. Ажыл берге, ынчалза-даа төлевири эки болганындан аңаа ажылдап өөрени берген улус чылдың-на тарылгага киржип турар. Бир неделя азы 10 хонук ажылдаарга, шалыңы – 30 муң рубль.
Аъш-чемни болгаш кывар-чаар материалды Шагаан-Арыгда арга-арыг ажыл-агыйы хандырып берип турар.
