Тываныӊ күрүнениӊ ойнаар-кыстар театрынга салым-чаяанныг чогаалчы, цирк артизи Алексей Агбаанович Хуурактың чырык адынга тураскааткан чогаадыкчы кежээ болуп эрткен. Ук хемчегге чогаалчыныӊ чаа үнген «Адам, ɵгбем Кɵдүрге деп адап алган…» деп номунуӊ таныштырылгазы болган. Кежээни эртемден В. С. Салчак удуртуп эрттирген.
Байырлалга Тываныӊ Чогаалчылар эвилелдериниӊ удуртукчулары: шүлүкчү, Россияныӊ журналистер эвилелиниӊ кежигүнү, ТР-ниӊ чогаалчылар Эвилелиниӊ кежигүнү С. М. Ондур, филология эртемнериниӊ кандидады, очулдурукчу, чогаал сайгарыкчызы С. С. Комбу; чогаалчы, башкы, РФ-тиӊ чогаалчылар Эвилелиниӊ кежигүнү М. Н. Ооржак; уран чүүлдүӊ кандидады, А. Б. Чыргал-оол аттыг уран чүүл колледжизиниӊ директору А. Х. Каӊ-оол болгаш өскелер-даа А. Хуурактыӊ чогаалыкчы ажыл-ижинге хамаарышкан илеткелдерни кылган.
А. С. Пушкин аттыг Национал ном саӊыныӊ ажылдакчылары чогаалчы А. Хуурактыӊ ажыл-ижинге тураскааткан номнар делгелгезин кылган. Аӊаа чогаалчыныныӊ өг-бүлезинден алган солун, төөгүлүг чуруктарны база делгээн.
«Адам, ɵгбем Кɵдүрге деп адап алган…» деп чогаалдар чыындызын национал болгаш чурт-шинчилел чогаалының килдизиниң ажылдакчылары Е. М. Ак-кыс, Ч. Э. Монгуш белеткээннер.
Кежээге А. Хуурактыӊ өг-бүлезиниӊ, ажыл-ижиниӊ дугайында чуруктарны Кызылдыӊ уран чүүл колледжизиниӊ чурулга салбырыныӊ сургуулдары чурааш делгелгени кылганнар. Тергиин чураан сургуулдарга чогаалчыныӊ уруу Татьяна Ондар шаӊналдарны тывыскан.
Кежээни Национал театрныӊ артистери, Кызылдыӊ уран чүүл колледжизиниӊ сургуулдары, башкылары чогаалчыныӊ шүлүктеринден бижиттинген ырларны, шүлүктерни күүседип, каастаан.
Байырлыг кежээ чогаалчыныӊ төрелдериниӊ сактыышкын чугаалары-биле доозулган.
