Тываның Чогаалчылар эвилели чогаал шинчилекчилериниң тургузукчу семинарын организастап эрттирген. Эртемденнер солун медээ-сайгарылганы ужуражылга үезинде кылган.
"ТР ЧЭ"-ниң ажылының бир угланыышкыны "Чогаал шинчилекчилеринге семинарлар эрттирери" деп филология эртемнериниң кандидады Уран Донгак дыңнаткан. Семинарның удуртукчузу Уран Донгак Л.Ооржактың чаа үнген "Эскериглер" деп литература- публицистиг номунга үнелелди берген. Оон аңгыда семинарның ажылының үезинде "Кайгал" деп шииге сайгарылга-үнелелдер солун болган.
Тываның сураглыг чогаал шинчилекчизи Антон Калзанның чогаал сайгарылгазынга ажылдары тускай чыынды ном кылдыр бо хонуктарда чырыкче үнүп келгени киржикчилерге өөрүшкүлүг медээ болган.
Сайгарылга үезинде чогаал шинчилекчилери эртемденнер, чогаалчылар, тыва дыл, чогаал башкылары ажык байдалга тыва дыл болгаш тыва чогаалдың бөгүнгү байдалы, келир үеде сайзыралынга хамаарыштыр чугааны кылганнар.Семинарның ажылы тускай план езугаар уламчылаар.
Республиканың башкылары база чогаалга сундулуглар тыва чогаал шинчилээринге семинар башкыларга, студентилерге, чаа бижип эгелеп чоруур аныяктарга ажыктыг болур деп түңнээннер.
#Тываныңчогаалчыларэвилели #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews
