Россияда чарлаттынган Башкы болгаш дагдыныкчының чылынга тураскааткан солун хемчег республиканың көрбес болгаш көөрү багай улуска тускайлаттынган ном саңынга болуп эрткен ТР-ниң Чогаалчылар эвилели дыңнаткан.
Ном саңының аалчылары – Тывада билдингир чогаалчы башкылар Мария Күжүгет болгаш Лидия Ооржак чыылганнарга боттарының төөгүзүн, чогаал дугайында солун чугаа-соотту сөңнээннер.
Башкы деп мергежилди чедип алганын, ук мергежилдиң онзагайын, бөгүнге дээр аңаа бараан болуп чоруурун ужуражылганың маадырлары амыдыралчы чижектерге болгаш чогаалдарынга даянып, чаңгыс чер-чурттугларынга аажок солун кылдыр таныштырганнар. Барык-ла ийи шак ажыр болган чугаа ажык, чоок, каткы-хөглүг, баштак байдалда эрткен.
Ном саңының методизи Уран Ооржак башкыларга тус-тус айтырыгларны салып, ужуражылганы, чугаа-соотту ыры-хөгжүм-биле согажалап эрттиргени чараш болган.
Мария Күжүгеттиң шүлүктеринге чаа ырларны Көрбес болгаш көөрү багай улустар клувунуң эргелекчизи Кертик-оол Данзын чугаа аразында бараалгадып, дыңнакчыларның хей-аъдын бедик көдүрүп турган.
Ужуражылгада келген киржикчилерниң айтырыглары хөй, чиге, тодаргай болганындан чугаа ужуу оранчок шөйлү бергени безин шыланчыг эвес болган. Мария Күжүгет болгаш Лидия Ооржак шүлүктерин номчуп, хөй-хөй айтырыгларга харыылааннар.
Ужуражылга киржикчилери боттары база төөгүлүг сактыышкыннарын, күзелдерин, аудиобижилгелиг номнардан чогаалдарның сорунзалыын демдеглеп, шак-ла мындыг ажык ужуражылгаларга удаа-дараа кээрин, чаа номнардан номчуп берип турарын чогаалчы башкылардан дилээннер.
Бүгү-российжи көрбестер ниитилелиниң Тывада база Кызыл хоорайда салбырларның удуртукчулары Геннадий Биче-оолович, Ангыр Байырович, журналист Светлана Байыровна, хоочун Алдын-Кыс Мончук-Холовна болгаш өскелер-даа шүлүктерниң онзагайын эскерип, бөгүнгү ужуражылгадан сеткил тодуг чанып турарын өөрүп демдеглээннер.
Боттарының хуузунда, аалчы болуп келген башкылар ном саңынга удаа-дараа кээп турарын, чаа чогаалдардан номчуп берип турарын аазааннар.
Ужуражылганың киржикчилери удавас юбилейлиг байырлалы чоокшулап орар чогаалчы башкы Лидия Ооржакка изиг байыр чедирип, боодал чечек тутсуп, чылыг күзээшкиннерни сөңнээни хемчегни улам каастаан, аян-шинчи киирген.
