П.А. Морозов аттыг аграрлыг лицейге РФ-тиң болгаш ТР-ниң Чогаалчылар эвилелиниң кежигүннери-биле ужуражылга болуп эрткенин өөредилге чери дыңнаткан. Лицейниң директору Резеда Тулуш эге сөстү ап, чыылганнарга байыр чедирген.
Көскү күрүне ажылдакчызы, Москвада Тыва чогаалчылар салбырының даргазы Борис Балчий-оол база фэнтези жанрынга бижип чоруур чогаалчы Тахир Мекпер-оол-биле болган ужуражылганың кол сорулгазы – аныяк-өскенниң төрээн чуртунга ынакшылын, чоргааралын чогаал дамчыштыр көргүзери.
Ада-чурт камгалакчыларынының дугайында «Силер-биле кады бис» деп Россияның национал шүлүктериниң антологиязынче Б.К. Балчий-оолдуң чогаалы кирген, ол чогаалының дугайында автор өөреникчилерге сонуургадып чугаалаан.
Борис Константинович «Төрээн чурт дээш» деп российжи литературлуг шаңналдың тиилекчизи деп чүүлдү уруглар билип алганнар. Т.Т. Мекпер-оол – Кызыл хоорай чагыргазының «Чылдың чогаалчызы-2024» деп шаңналының тиилекчизи, канчап чогаал ажылынче шымнып киргенин, быжыг тура-сорук дугайында чугаалаан.
Аалчылар ада-чурт камгалакчыларының дугайында ада-чуртчу шүлүктерин орус, тыва дылга бараалгадып күүсеткеннер. Лицейжилер сонуургаан айтырыгларын салган. Ужуражылгага ниитизи-биле 300 хире өөреникчи, башкылар киришкен.
