Шагаа бүдүүзүнде Кызыл хоорайның бир дугаар эдип-чазаар колониязының шииттирген кижилери «Чоннуң сүлдези» төлевилелдиң идепкейжилери, ат-сураа билдингир культура ажылдакчылары болгаш Тываның Камбы-Лама эргелелиниң Башкызы-биле ужурашканын Россияның Кеземче күүселдезиниң федералдыг албанының Тывада эргелелиниң парлалга албаны дыңнаткан.
Хемчегни Россия Федерациязының алдарлыг артизи, Тываның Улустуң хөөмейжизи Коңгар-оол Ондарның дугайында документалдыг кино көргүзүү-биле ажыткан. Ат-сураглыг хөөмейжиниң туруштуг ажылының ачызында бо хүн хөөмей болгаш тыва хөгжүм бүгү делегейде чаңгыланып турар. Бөмбүрзектиң хөй-хөй чурттарының хүндүлүг аалчызы, аныяк-өскенниң башкызы, деткикчизи, сүмелекчизи чораан.
Султим Гялцен Башкы сарыг шажын чүдүлгезиниң өөредиглиг тайылбырын кылып, чагыгларын бергеш, мөргүл номчаан.
Тыва улустуң езу-чаңчылдарынга болгаш аас чогаалынга үндезилеттинип тургустунган, хөөмейни хөгжүткен, алдарлыг «Тыва» ансамбли солун концертти бараалгаткан. Хөгжүмчүлер хөөмей, национал хөгжүм херекселдериниң болгаш фольклор жанрларының дугайында чугаалап берген.
Аалчылар хоругдалда кижилерге боттарының чогаадыкчы ажыл-ижин таныштырып, келир өйгү планнары-биле үлежип, салган айтырыгларга харыылаан.
Ужуражылга «Шагаа мергени» деп хүндүлүг аттың эдилекчизи Артыш Монгуш баг адарынга мастер-класс-биле доозулган.
«Чоннуң сүлдези» төлевилелдиң кол сорулгазы – чоннуң сагыш-сеткилин, иштики мөзү-шынарын, делегейже көрүжүн тыва езу-чаңчылдарның, бурунгу ужурларның дузазы-биле чараш чүүлдерже угландырып, амыдыралга туружун быжыглаары болур.
