Тывада электроннуг дневниктер болгаш журналдар сервистерлиг “Сферум” информация-коммуникация өөредилге шөлүнче каттыштырар ажыл доозулганын регионалдыг Өөредилге яамызы дыңнаткан.
VK Мессенджерде «Сферум» өөредилге шөлүнүң дузазы-биле электроннуг дептерден база дневниктен ам башкылар, өөреникчилер болгаш оларның ада-иелери харылзаа чаттарынга бижижип, онлайн-кыйгыртыгны кылып болур апарган.
Башкылар электроннуг журналга кичээлди планнап, ону эрттирип, VK Мессенджер информация солчулгазның шөлүнге коштунган өөреникчилерни көөр аргалыг. Ол ышкаш файлдар, чуруктар, 4 ГБ чедир хемчээлдиг видео дээн өөредилге материалдары-биле чатка солчуп болур.
Чурагайлыг чаа шөл өөредилге чорудуун таарыштырып, эптиг болгаш чедингир болдуруп, ооң дузазы-биле башкылар, өөреникчилер болгаш оларның ада-иелериниң аразынга харылзаажырын элээн чиигедип, республиканың школаларынга чаңгыс аай айыыл чок өөредилге делгемин тургузуптар дээрзинге Тываның Өөредилге яамызы ынанып турар.
Чаа чурагай делгеминиң бүгү-ле аргаларын ажыглаар дизе, өөредилге углуг электроннуг журналга база дневникке бодунуң хууда арынын чаңгыс катап быжыглаар апаар. Сервис халас болур болгаш, ында кандыг-даа реклама, спам чок.
“Чурагайлыг өөредилге хүрээлеңин” боттандырары-биле 2021 чылда «Сферум» төлевилелди ажылдаткан. Дневник.ру – ажыглакчылар демдектерин, расписаниезин болгаш бажыңга онаалгаларны дүн-хүн дивейн көрүп алыр кылдыр «Дневник.ру» компанияның өөредилге организацияларынга дээш ажылдап кылган халас чурагайлыг шөл болур.
Тываның студентилери буддийжи университеттерде
Дээди өөредилге черлериниң студентилери буддизмниң философиязын, медициназын болгаш сарыг шажын уран чурулгазын өөренип турар.