Чыл төнчүзүнге чедир 350 хире кижизидикчи башкы мергежилин бедидер

Башкы болгаш дагдыныкчының чылында, Тывада уруглар садтарының кижизидикчи башкылары «Уруглар сады – сайзыралдың оруктары» төлевилелге киришпишаан, боттарының профессионал билиг-мергежилин бедиткен.

«Өөредилге» национал төлевилелдиң «Амгы үениң школазы» федералдыг төлевилели-биле, Россияның чырыдыышкын яамызының грант акша-хөреңгизинге Тываның өөредилгени хөгжүдер болгаш билиг-мергежил бедидер институдунда школа назыны четпээн өөредилге черлериниң башкыларынга шак ындыг аттыг стажировка шөлчүгежи ажылдап турарын сагындыраал. Институт командазының ажылдап кылган төлевилелинче конкурс шилилдезиниң тиилекчилери база күрүне деткимчези алганнар кирген.

Төлевилелдиң кол сорулгазы – назы четпээн өөредилге албан черлериниң ажылынга организас-методиктиг үделгени кылып турар организацияларның удур-дедир харылзаазының четки шөлүн тургузары.

Төлевилелдиң өөредилге курстары регионалдыг курлавырлар төптери статустуг база инновация төлевилелдериниң федералдыг төптери болур институттуң, Кызылдың 1 дугаарлыг «Алдын дүлгүүр» база Чөөн-Хемчик кожууннуң Чадаана хоорайда «Хээлер» уруглар садтарының баазазынга болуп эртер.

Кижидикчи башкыларның өөредилгезинче база башкылаашкынның эки арга-дуржулга солчулгазынче билиг-мергежил бедидериниң тос курузун декабрьга чедир эрттирерин планнаан. Төлевилелдиң киржикчилери ажыл-агыйжы оюн хевиринге ужуражып, билиг-мергежил бедидериниң дөрт курузун дыңнаан. Ынаар школа назыны четпээн 31 организациядан 118 башкыны хаара туткан.

Ноябрьның баштайгы он хонуунда бирги семинарлар болуп эртер. Ноябрь 6-11 хонуктарында Тываның өөредилгени хөгжүдер болгаш билиг-мергежил бедидер институдунга «Үре-түңнелдиг удуртукчунуң школазы» курс, ноябрьның 9-10-да Чадаананың «Хээлер» уруглар садынга – «Назы четпээн өөредилгениң федералдыг күрүнениң өөредилге стандарттарынга дүүштүр амгы үениң назы четпээн өөредилге негелдези-биле биче кижизидикчиниң профессионал белеткелиниң ужур-утказы» курс болуп эртер.

Назы четпээн өөредилге программазын боттандырып турар республиканың 50 организациязындан 350 хире башкыны 2023 чылдың төнчүзүнге чедир организас-методиктиг курстарже хаара тударын организаторлар планнаан.