Россияның экспорт төвүнүң (РЭТ, ВЭБ.РФ бөлүү) эрттирип турары «Чылдың экспортчузу-2025» бүгү-россия шаңналынга киржир дугайында билдириишкиннерни ам-даа хүлээп турар. РФ-тиң Чазаа «Делегей чергелиг кады ажылдажылга болгаш экспорт» национал төлевилелдиң күүселдези-биле ол шаңналды доктааткан.
Күзүн «Россияга бүдүрген» деп делегей чергелиг экспорт шуулганының үезинде федералдыг чаданың тиилекчилерин шаңнаар. Экспортчулардан билдириишкиннерни май 31-ге чедир бүрүткээр, документилерни РЭТ-тиң сайтызында – exportcenter.ru/awards-тан электроннуг анкетаны долдургаш, киирип болур.
Организакчыларның демдеглеп турары-биле алырга, бо чылын «Үлетпүр адырында чылдың экспортчузу», «Чылдың инвестору», «Белен аъш-чем талазы-биле чылдың экспортчузу» деп номинациялар эң нептереңгей. Шаңналче киржилге халас. Мөөрей шуптузунга – улуг компаниялар, биче болгаш ортумак сайгарлыкчы чорук, ол ышкаш бот-тускайлаң сайгарлыкчыларга ажык.
Чурттуң кайы-даа булуңнарындан экспортчулар идепкейин көргүзүп эгелээн. Бо хүнге чедир Төп, Ыраккы Чөөн чүк база Сибирь федералдыг округтар компанияларындан болгаш хууда сайгарлыкчылардан мөөрейге киржир дээн билдириишкиннер эң хөй кирген. Ниитизи-биле чурттуң 66 регионундан билдириишкиннер бар.
"Чылдың экспортчузу” деп шаңналды чаалап алыры компанияларга хөй аргаларны ажыдар: ылгавыр демдээниң таныттынгырын бедидер, ажыл-агыйжы ат-алдарын быжыглаар, шынчы партнерларның болгаш инвесторларның кичээнгейин хаара тудар, тиилекчиниң эрге-байдалын маркетинг сорулгаларынга ажыглаар. Бо дээрге экспортче угланган компанияларга боттарының чедиишкиннерин көргүзеринге болгаш бүгү чурт деңнелинге билдингир апаарынга дыка эки арга-дыр" – деп, Россияның экспорт төвүнүң чиңгине директору Вероника Никишина чугаалаан.
2025 чылда 20 номинацияга шаңналды тыпсыр: 12 кол (биче болгаш ортумак сайгарлыкчы чорукка алды база улуг бизнеске алды) база экспорт ажыл-чорудулгазының аңгы-аңгы угланыышкыннарын – машина-тудуг, үлетпүр, агроүлетпүр комплеки дээш, оон-даа өске угланыышкыннарны хаара туткан немелде сес номинацияга тыпсыр.
Тиилекчилерни ийи чадага тодарадыр:
1. Округ чадазы – федералдыг округ бүрүзүнде тиилекчилерни июль айда илередир.
2. Федералдыг чада – эң-не тергиин округ тиилекчилериниң аразындан федералдыг деңнелде шилиир.
Эге чадада экспортчуларга чүгле үндүрүг органында бүрүткелде тургустунган дугайында херечилелдиң электроннуг хоолгазы (ИНН хоолгазы), а БОС компаниялырынга – биче болгаш ортумак сайгарлыкчы чорук субъектилериниң чаңгыс аай даңзызындан медээлерни киирер.
Россияның экспорт төвү (РЭТ, ВЭБ.РФ бөлүү) – чиг этке база энергетикага хамаарышпас экспортту деткип турар күрүне албан чери. Ол «Делегей чергелиг коперация болгаш экспорт» национал төлевилел күүселдези-биле делегей чергелиг рыноктарже үнериниң бүгү чадаларында аңгы-аңгы адырларның компанияларынга саң-хөө болгаш саң-хөөге хамаарышпас дузаны көргүзүп турар. РЭТ бөлүүнче Россияның экспорт чээлизинге болгаш инвестицияга камгаладылга агентилели (ЭКСАР), РОСЭКСИМБАНК база «Экспорт школазы» кирип турар. РЭТ бөлүүнүң саналдааны ачы-дузаларның көвей кезии «Мээң экспортум» күрүнениң чурагай шөлүнде онлайн-хевирге ажыглаттынып турар.
