2025 чылда инженер мергежилдерже дужаап кирер күзелдиг школа доозукчулары-биле тускай сорулгалыг беш дугуржулгада ат салдынган.
Доозукчулар Тываның күрүне университединче дужаап киргеш, амгы үеде «Электроэнергетика болгаш электротехника» база «Чер кырында транспорт-технологтуг чүүлдер» деп мергежилдерде хүндүскү база бот-өөредилге-биле өөренип турар. Яамының бо неделяда болуп эрткен түңнел коллегия хуралынга регионнуң одалга-энергетика адырынга кадрлар курлавырын тургузар дээш чоруткан хемчеглерин сайгарып чугаалашкан.
Одалга-энергетика яамызының деткимчези-биле, 2025 чылда «Межегейхөмүрнүң перспективтиг технологиялары – болбаазырадылга» кызыгаарлаан харыысалгалыг ниитилел биле Тываның күрүне университеди хөмүр тывыш компанияларынга кадрларны белеткеп база ажылче хаара тудар дугайында дугуржулганы чарган.
2026 чылда «Тываэнерго» акционерлиг ниитилел база Кызылдың чылыдылга энергетика төвү-биле шак ындыг дугуржулгага атты салырын планнаан.
Тываның Одалга-энергетика яамызының дыңнатканы болза, 2025 чылдың төнчүзүнге чедир чылыдылга болгаш энергетика комплекизиниң бүдүрүлгелеринде ниитизи-биле 1214 кижи (58 хуузу) ажылдап турар. 730 кижи (35 хуузу) септелге-оперативтиг ажылдарда (смена болгаш цехтер) болза, оларның 393-ү (19 хуузу) көдээ суурларда, а хоорайларда 1569 кижи ажылдыг (75 хуузу).
Чыл эгезинде бүдүрүлгелерде 145 хостуг олут турган (7 хуузу), оларның хөй кезии чылыг-энергетика адырында (котельнаялар, электри станциялары, дизельдиг электри станцияларда).
Ажылчыннарның ажылдан үнер чоруу 11,4 хуу хире, колдуунда септелге-оперативтиг ажылдарда (смена болгаш цехтер), инженер-техниктиг кадрларда бооп турар, ол дээрге Россияның одаар чүүл болгаш энергетика адырында ортумак деңнел – 10-13 хууга дүгжүп турар.
