Шагаан-Арыг хоорайның улуг төп одалга чериниң чылыдылга трассазында "Коммунал инфратургузуг чаартылгазы" регионалдыг программа-биле үндезин септелге уламчылап турарын чагырга чери дыңнаткан.
Хоорайның беш аңгы девискээринде ниитизи-биле 6,53 километр чылыдылга трассазын каскаш, бүрүнү-биле солуп турар. Үндезин септелгени кылып эгелээн хүлээникчи тудуг организациязы август айда солушкан, катап садыглажыышкыны чарлаан. «Туваасбестстрой» кызыгаарлаан харыысалгалыг ниитилел (Митюков В.И.) улаштыр септелге ажылдарын кылып эгелээн.
Ада-ие ажы-төлүнге септелге ажылдары чоруп турар черлерде, казып каан оңгарларга ойнап болбас, айыылдыг дээрзин эки чагып-сургаарын чагырга чери сагындырган.
Чылыдылга трассазының септелгезин октябрь айда доозары көрдүнген. Тудуг ажылдары орай кежээге чедир чоруп турар.
