Чөөн-Хемчик кожууннуң Чыраа-Бажы суурда Ооржак Хорагай аттыг чаартынган культура бажыңын байырлыг байдалга ажыткан. ТР-ниң культура сайыды Виктор Чигжит байырын чедирип, культура ажылдакчыларынга болгаш тудугжуларга шаңналдарны тывыскан.
«Культура» национал төлевилел күүселдези-биле, Тываның көдээ черлеринде – Өвүр кожууннуң Саглыда, Кызыл кожууннуң Каа-Хем, Чөөн-Хемчик кожууннуң Чыраа-Бажы суурларда Культура бажыңнарынга үндезин септелгени бо чылын кылып дооскан.
Федералдыг база республика бюджеттеринден кады акшаландырыышкын-биле 38 ажыг сая рубльди программа күүселдезинче тускайлаан.
1500 кижи чурттакчылыг Чыраа-Бажы суурда, 1964 чылда туттунган көдээ культура бажыңынга бо чазын септелге ажылдары эгелээнин сагындыраал. Ажыы-биле чугааларга, совет үеде туткан оран-саваны тудугжулар таныттынмас кылдыр бүрүнү-биле чаарткан: таваан немей кудуп, адаккы ыяштарын солуп, ыяш ханаларын быжыглаан, одалга системазын, шалаларын, дээвиирин бускаш, чаа материалдар-биле кылган, үнер-кирер, иштики эжиктери ам чаа, ханаларны база дээвиирин гипс картон-биле шыпкаш, иштики шеверлел ажылдарын кылган, чырык удазыннарын чаарттынган, өрт медээчизин салып, чаа декпени тудуп, даштын чылыглаан.
Ноябрь төнчүзүнде культура одаанче чылыгны киирген, дүүн чаартынган оран-саваны ажыткан. Чыраа-Бажы суурнуң улуг-биче чону тудугжуларга четтиргенин илередип, өөрүшкүзүн үлешкен.
