Республиканың көдээ ажыл-агый бараан бүдүрүкчүлериниң «Дүжүт-2023» делгелге-ярмарказынга муниципалдыг тургузуглар командаларының аразынга эрткен мөөрейге Өвүр кожууннуң көдээ ишчилери бирги черге төлептиг болган.
Тиилелге «Адарган», «Торгалыг» муниципалдыг унитарлыг бүдүрүлгелерниң малчыннарының болгаш кожууннуң ишчилериниң (Чодураа Куулар, Любовь Куулар, Долаана Комбу) ачызында чедип алдынганын чагырга чери дыңнаткан. ТР-ниң көдээ ажыл-агый болгаш аъш-чем сайыды Алдай-Мерген Ховалыг өвүржүлерге 50 000 рубльдиң сертификадын тывыскан.
Хандагайты биле Саглы сумуларының малчыннары болгаш көдээ ишчилери делгелгениң чуруму езугаар белеткенгеш, аъш-чемин бараалгаткан.
Көдээ ажыл-агый болгаш болбаазырадылга үлетпүрүнүң ажылдакчызының хүнүнге тураскааткан дүжүт байырлалынга республиканың 100 ажыг көдээ ажыл-агый бүдүрүкчүлери киришкен.
ТР-ниң Көдээ ажыл-агый болгаш аъш-чем яамызының дыңнатканы-биле алырга, бо хүнде республикада 33 муң хире хууда дузалал ажыл-агыйы, 1800 ажыг тараачын-арат ажыл-агыйы бар.
