Тываны Кадык камгалал яамызының дыңнадып турары-биле алырга, республикада «Тыва Республиканың Улустуң эмчизи» аттың эдилекчилериниң саны – 45. Кадык камгалалының хоочуну, хирург-онколог Алевтина Сиразитдиновага хүндүлүг атты 2019 чылда тывыскан.
Алевтина Кыргысовна республиканың онкология албан черин тургузуп, хөгжүдериниң эге чадазындан ажылдап эгелээн. Ажылдап чораан үелеринде дыка хөй кезиишкиннерни кылып, амбулаторлуг онкологияны сайзырадырынга улуг үлүг-хуузун киирген. Химиотерапияның бирги аргазын ажыглап эгелээн. Химиотерапияның ажыглалынче, херел-биле эмнээр методиканы экижидеринче улуг кичээнгейни салган.
Республиканың кадык камгалалының аңгы-аңгы албан черлеринге ажылдап чорааш, кадык камгалалында дыка хөй айтырыгларны көдүрүп, шиитпирлээн. Онкология албанының материалдары-биле эртем ажылдарын чорударының эгезин салып, химиотерапевтке, ийи хирург-онкологтарга, херел диагностиказының эмчизинге кандидат эртем адын камгалаарынга идигни берген.
Алевтина Кыргысовна кадык камгалал шугумунда 50 ажыг чыл ажылдап турар. Ооң дагдыныкчы ажылының үре-түңнелдери: 13 ординаторну белеткешкен, оларның бежи медицина эртемнериниң кандидады эртем аттарын камгалап алган.
Тываның Улустуң эмчизи аныяк тускай мергежилдиглерниң арга-дуржулгалыг дагдыныкчызы, республикада дыка хөй аныяк кезер эмчилерни болгаш онкологтарны кижизидип өстүрген: медицина эртемнериниң кандидаттары Алефтина Шивит-оол база Александр Ванданов, Солангы Ховалыг, Салбак Хирлиг-оол болгаш өскелер-даа.
Кезер эмчи, онколог-хирург эмчи Алевтина Сиразитдинованың күш-ажылын – участок эмнелгезинден эгелээш республиканың тускайжыттынган эмнелге албан черинге чедир, ординатор эмчиден кадык камгалалының организаторунга чедир ооң эрткен күш-ажылчы оруун Тыва Республиканың база Россия Федерациязының Чазаа бедии-биле үнелээн.
Тыва Республиканың база Россия Федерациязының кадык камгалалынга ачы-хавыяазы дээш, 1991 чылда «Тыва АССР-ниң алдарлыг эмчизи», 2006 чылда «Россия Федерациязының алдарлыг эмчизи» аттарны тывыскан. Ол 2018 чылда Россияның эмчилериниң «Үнелээшкин» деп дээди шаңналының «Мергежилинге бердингени дээш» угланыышкынынга лауреат болган бирги тыва эмчи.
Эрткен чылын кадык камгалалының хоочунунга Россияның Президентизи “Дагдыныкчы чоруу дээш” деп ачы-хавыяа демдээн тывыскан.
