Чаа чыл бүдүүзүнде, Тыва Республиканың Чазааның бажыңынга, аңгы-аңгы адырларның хоочуннарынга ССРЭ-ниң составынче Тываның эки тура-биле киргениниң 80 чылынга тураскааткан юбилейлиг медальдарны тыпсыр байырлыг езулал болуп эрткен.
Тываның Баштыңы [id360104045|Владислав Ховалыг] шаңнал алганнарның шуптузун Ада-чуртунга бараан болурунга берген хөй-хөй чылдары, күш-шыдалы, күчү-күжү, төрээн черинге ынакшылы каттыштырып турарын демдеглээн.
Тыва Республиканың социал-экономиктиг хөгжүлдезинге киирген үлүг-хуузу база хөй чылдарда ак сеткилдиг ажылы дээш юбилейлиг медальдар-биле шаңнатканнарның аразында кадык камгалал системазының хоочуну Алевтина Сиразитдинова база бар.
Алевтина Сиразитдинова республиканың онкология албан черин тургузуп, хөгжүдериниң эге чадазындан ажылдап эгелээн. Ажылдап чораан үелеринде дыка хөй кезиишкиннерни кылып, амбулаторлуг онкологияны сайзырадырынга улуг үлүг-хуузун киирген. Химиотерапияның бирги аргазын ажыглап эгелээн. Химиотерапияның ажыглалынче, херел-биле эмнээр методиканы экижидеринче улуг кичээнгейни салган.
Тываның кадык камгалалының аңгы-аңгы албан черлеринге ажылдап тургаш, кадык камгалалында дыка хөй айтырыгларны көдүрүп, шиитпирлээн. Онкология албан чериниң материалдары-биле эртем ажылдарын чорударының эгезин салып, химиотерапевтке, ийи хирург-онкологтарга, херел диагностиказының эмчизинге кандидат эртем адын камгалаарынга идигни берген.
Алевтина Кыргысовна кадык камгалал шугумунда 50 ажыг чыл ажылдап турар. Тываның Улустуң эмчизи аныяк тускай мергежилдиглерниң арга-дуржулгалыг дагдыныкчызы, республикада дыка хөй аныяк кезер эмчилерни болгаш онкологтарны кижизидип өстүрген: медицина эртемнериниң кандидаттары Алефтина Шивит-оол база Александр Ванданов, Солангы Ховалыг, Салбак Хирлиг-оол болгаш өскелер-даа.
Онколог-хирург эмчиниң күш-ажылын – участок эмнелгезинден эгелээш республиканың тускайжыттынган эмнелге албан черинге чедир, ординатор эмчиден кадык камгалалының организаторунга чедир ооң эрткен күш-ажылчы оруун Тыва Республиканың база Россия Федерациязының Чазаа бедии-биле үнелээн.
Тыва Республиканың база Россия Федерациязының кадык камгалалынга ачы-хавыяазы дээш, 1991 чылда «Тыва АССР-ниң алдарлыг эмчизи», 2006 чылда «Россия Федерациязының алдарлыг эмчизи» аттарны тывыскан. Ол 2018 чылда Россияның эмчилериниң «Үнелээшкин» деп дээди шаңналының «Мергежилинге бердингени дээш» угланыышкынынга лауреат болган бирги тыва эмчи. 2019 чылда «Тыва Республиканың Улустуң эмчизи» хүндүлүг атты, 2022 чылда кадык камгалалының хоочунунга Россияның Президентизи “Дагдыныкчы чоруу дээш” деп ачы-хавыяа демдээн тывыскан.
Ол ышкаш юбилейлиг медальдарны «Орус географтыг ниитилел» бүгү-российжи хөй-ниити организациязының Тывада салбырының даргазы Кара-кыс Аракчаага, Тываның Баштыңының чөвүлекчизи, күш-ажылдың хоочуну Александр Бегзиге, дайынның, күш-ажылдың, чепсектиг күштерниң болгаш корум-чурум камгалаар органнарның бүгү-российжи хоочуннар организациязының Тывада салбырының даргазы Сагаан-оол Долгарга, Тыва Республиканың күрүне ажылдакчылары, күш-ажылдың хоочуннары Алдын-оол Канзайга, Дандар-оол Ооржакка, Чимит-Доржу Ондарга, Григорий Ширшинге, Даваа-Самбуу Яндакка, Хонук-оол Монгушка, Тыва Республиканың бирги президентизи Шериг-оол Ооржакка, социал адырның хоочуну Ольга Дамдынга, күрүнениң чер хайгааралы, чер тургузуунуң хоочуну Виктор Дандарга, көдээ ажыл-агыйының хоочуннары Дадар-оол Донгакка, Олег Кызыл-оолга, Маадыр Шывыкка, тус чер бот-башкарылга органнарының хоочуннары Александр Дронинге, Владимир Евсеевке, Светлана Созиновага, арга-арыг ажыл-агыйының хоочуну Владислав Канзайга, арга-арыг ажыл-агый адырында күш-ажылдың хоочуннары Сергей Сапелкин биле Андрей Попеляевке, күш-ажылдың хоочуннары Нина Сарыглар биле Кошкар-оол Ондарга, өөредилге системазының хоочуннары Валентина Ондарга, дээди өөредилгениң хоочуну, Тывада ССРЭ-ниң хостуг хүрешке бирги спорт мастери Оргеллээр Ондарга, кадык камгалал системазының хоочуну Роза Ширшинага, спорттуң хоочуннары, Россияның ча адарынга алдарлыг тренерлери Евгений Тутатчиков биле Раиса Тутатчиковага, тыва телевидениениң хоочуну Дыдый Сотпага, Тываның улустуң чогаалчызы, күш-ажылдың хоочуну Кара-Күске Чоодуга тывыскан.
