Бии-Хем кожуунуң Аржаан сумузундан шериг операциязының киржикчи Буян Адышаа Туранда хайындырарынга белен аъш-чем бүдүрер биче цехти бөгүн байырлыг байдалга ажытканын чагырга чериниң даргазы Екатерина Тулуш дыңнаткан.
Эгелеп чоруур сайгарлыкчы бии-хемчилерге хайындырарынга белен аъш-чем – манчы, бууза, орама, манчылыг мүн, котлета, тефтельдерни болгаш эът аймаан садып эгелээн.
Буян биле Светлана Адышаалар “Чаа сорук” төлевилелдиң киржикчилери. Олар бода болгаш чылгы малды тудуп турар.
– Адышааларның үш ажы-төлдүг аныяк өг-бүлези кожуун төвүнде хайындырарынга белен аъш-чем бүдүрер биче цехти ажыдып алдылар. Бүдүрүлгезиниң оран-савазын хөлезилеп турар. Удавас бии-хемчилерден эътти чогумчалыг өртекке хүлээп эгелээр. Ада-иезинге улуг уруу дузалажып турар.
Буян Адышаа тускай шериг операциязынче эки турачылап чорупкан турган. Дайынчы хөделиишкиннер хоочуну аар балыглаткан. Үргүлчүлелдиг эмнээшкин соонда, чанып келгеш, чымыштыг ажыл-ижинче шымнып кирипкен. Будунга кедирер протезти чоокта чаа алды. Адышаалар уругларының келир үези дээш кызымаккай ажылдап турар – деп, чагырга даргазы медеглээн.
Аржаандан тускай шериг операциязының үш дайынчызы күрүне программазының киржикчилери болган. Оларның бирээзи Айдыс Тюлюш чоокта чаа Бии-Хемге чүък сөөртүлгезин (хөмүр-даш, ыяш, сиген, бараан...) чорудар ажыл-херээн эгелей берген. Үшкүзү Анатолий Байкара хууда дузалал ажыл-агыйынга үш бызаалыг инекти болгаш молдурганы садып алган.
