ТР-ниң Чазак Даргазының оралакчызының хүлээлгезин күүседип турар Айдыс Сынаа 41885 шериг кезээниң командири подполковник Т. Хуснутдиновтуң Өөрүп четтириишкин бижиктерин тускай шериг операциязының киржикчилериниң авалары Зоя Оюн биле Анжелика Русановага тывыскан.
– Тываның Чазаанче шериг кезектериниң командылалындан Өөрүп четтириишкин бижиктери доктаамал кээп турар. Ында республикадан дайынчы оолдар эрес-дидим чоруу-биле комадирлериниң болгаш кады дайылдажып турар эштериниң хүндүткелин чалаап ап турарын бижээн.
Бо удаада чаңгыс черде дайынчы даалгаларын коргуш чок күүседип турар оолдарның аваларын шаңнап, оларның дилеглерин дыңнадывыс. Бистиң талавыстан ук айтырыгларны шиитпирлер аргаларны тывар бис. Бирээзи чер участогунуң дугайында айтырыгны көдүрдү. Ону ТР-ниң Чер болгаш өнчү-хөреңги яамызы-биле шиитпирлээр бис. Ис чок читкен дайынчыга хамаарыштыр дилегни база хыналдавыста алдывыс – деп, Айдыс Сынаа чугаалаан.
Шериг кезээниң командылалы болгаш хууда составы аваларга оолдарын чурттуң төлептиг хамаатылары кылдыр кижизиткени дээш четтиргенин илереткен. Орлан Оюн биле Александр Русанов Донецк Улус Республикада шериг албан-хүлээлгезин эрттирип тургаш командирлериниң болгаш дайынчы эштериниң хүндүткелин чаалап алган.
Бичиизинден дузааргак Орлан Оюн дайынчы хөделиишкиннер девискээринде шеригжилерни шөлээ үезинде безин кагбаанын авазы дыңнаткан. Оюннарның өг-бүлези ийи оолдуг, бичиизи мунчу аарыглыг. «Оглум эрткен чылын шериг керээзи чарып алгаш, тускай шериг операциязынче чоруткан. Март айда шөлээлээр турган. Ол үеде хой өзеп алгаш манап турдувус. Оглум дайын төнерге, тиилелгелиг чанып келир бис дээн кижи» – деп, Зоя Оюн чугаалаан.
Александр Русановтуң авазы оглун апрель 21-ден тура ис чок читкен деп санадып турарын дыңнаткан. «Оглум өг-бүлези-биле Черногорск хоорайда чурттап турар. Уруу 11 харлыг. Уйнуум ачазынга дыка ынак болгаш бо-ла кажан кээрин айтыра бээр. Бисти чазак-чагырга утпайн, деткип турары өөрүнчүг-дүр. Оглум дириг тыптып келиринге идегеп, улуг бүзүрел-биле манап тур бис» – деп, Анжелика Русанова сагыш-сеткили-биле үлешкен.
Дайынчыларның авалары Тываның Чазаанга оолдары дээш сагыш-човап, оларның киирген дилеглерин дыңнап, шиитпирлээр аргаларын тып, доктаамал деткип турары дээш четтиргенин илереткен.
Чуруктарны Ада Тюлюш тырттырган