Бөгүн Ленин кудумчузунуң 45 дугаар бажыңынга Тываның көскү күрүне ажылдакчызы Дандар Ооржактың чырык адын мөңгежиткен тураскаал самбыраны ажыткан.
Кызыл хоорайның Төлээлекчилер хуралының даргазының оралакчызы Аяс Лопсан, Тываның гуманитарлыг болгаш тускай социал-экономиктиг шинчилелдер институдунуң директору Вячеслав Март-оол, Дандар Ооржактың чоок кижилери болгаш эш-өөрү ооң дугайында сактыышкыннарны кылган.
Аяс Лопсан ук тураскаал самбыраны Д.Д. Ооржактың ажылдап турганы Адвокат конторазының бажыңынга азар дугайында шиитпирлээн дугайында документини дамчыткан.
Дандар Ооржак – республикада билдингир үлегерлиг өг-бүле Дандар-оол Көк-Хунаевич биле Маны Оюновна Ооржактарның үш оглунуң улуу. Ол Тываныӊ бир дугаар Президентизи Ооржак Шериг-оолдуң оралакчызынга болгаш Канцелярия даргазынга ажылдап турган. Тываның Үндезин хоойлузунуң тургузукчуларының бирээзи. ТР-ниң Дээди хуралының ийи чыыжының депутадынга ажылдаан. Сөөлүнде юрист эртеминиң аайы-биле болчукчулап турган.
Тываның алдарлыг ажылдакчызы чайын бут бөмбүү, кыжын шайбалыг хоккей ойнаарынга ынак турганын кады өскен эштери сактып чугаалаан.
Партия совет болгаш күрүне ажылдакчызы, Кызыл хоорайның хүндүлүг чурттакчызы Дандар-оол Көк-Хунаевич Ооржак найысылалга тураскаал самбыраны кижи бүрүзүнге тургуспазын онзалап айтып, чедип келген чонунга, оглунуң эш-өөрүнге четтиргенин илереткен.
