Бай-Тайга кожууннуң чагырга даргазы Чингис Салчак оралакчылары-биле ыраккы Кара-Хөл сумузунуң Даштыг-Хөлде чурттап турар малчыннарның аалынга чедип, оларның чымыштыг ижи-биле таныжып четкенин чагырга чери дыңнаткан.
Ажылчын бөлүк Галина Дажыевна, Буян Алексеевич оларның мал-маганы кышты онча-менди, хүр ашканын демдеглээн. Малының деңгели шыырак болган. Инектери кидин түлүк төрүп эгелээн.
Кара-Хөлдүң бажында чурттап турар эң улуг назылыг эне Полина Люндуповна Хомушкунуң өдек-хонажынга чедип, частың башкы байырлалы-биле байыр чедирген.
Бай-Тайга кожууннуң Кара-Хөл сумузунда Алаш хем чоннуң аргыжылгазынга шаптараазыннарны бо-ла тургузуп келир шапкын хемнерниң бирээзи.
Кожууннуң чагырга даргазы амыдырал-хандырылга талазы-биле оралакчызы Аяс Хертек-биле хемни кежир көвүрүглерниң ниити байдалын база хынап көрген.
Малчыннарның кол дилээ – суму-биле аргыжар көвүрүглерниң байдалын өөренип, эде кылыры. Кожууннуң удуртулгазы көдээ ишчилерниң көдүрген нарын айтырыын шиитпирлээри-биле ажылды эгелээрин аазаан.
