Бөгүн В.Көк-оол аттыг Национал хөгжүм-шии театрынга ТР-ниң Дээди Хуралының Чаа чыл елказынга республиканың аңгы-аңгы булуңнарындан тускай шериг операциязының киржикчилериниң ажы-төлү киришкен.
Депутаттар корпузунуң мурнундан Дээди Хуралдың Даргазы Каң-оол Даваа байыр чедиргеш, оларның чырык чаагай күзелдери Чаа чылда шупту бүдерин, ада-иезиниң болгаш башкыларының чугаазын дыңнаарын чагып, өөредилгеге улуг чедиишкиннерни күзээн. «Бистиң камгалакчыларывыс – силерниң адаларыңар, акыларыңар тускай шериг операциязында дайынчы албан-хүлээлгезин эрес-дидими-биле күүседип турар. Силер оларга чоргаарланып чоруур силер» – деп, ол онзалап демдеглээн.
Уруглар «Үш чүүл эртемниг оол» деп тыва улустуң тоолун сонуургап көрген соонда, театрның ийиги каъдынга «Ак адыгга аалдап четкеш» деп оюн-тоглаалыг көргүзүгге идепкейлиг киришкеннер. Олар Соок-Ирей биле Харжыгаш база тоол маадырлары-биле кады ырлап-самнап, Шивини долгандыр ырлажып, хөглээннер.
Чаа чылдың кол оюн-тоглаазынче чалатканнарның аразында Сүт-Хөл кожууннуң Кызыл-Тайга сумузунуң алдыгы классчызы Эртине Ондар база бар. Ол оюн-тоглаалыг көргүзүг болгаш шии дыка солун болганын демдеглээн. Ооң ачазы тускай шериг операциязынче 2022 чылда эки турачылап чораан турган. Бо чылын ол шериг керээзин чаргаш, дайынчы хүлээлгезин күүседирин уламчылаан.
Роберт биле Белекмаа Ондарларның өг-бүлези үш ажы-төлдүг, Эртине ортун оглу. Улуг оглу Улан-Удэ хоорайда студент, хеймер кызы уруглар сады барып турар. Чуруттунарынга, самнаарынга ынак оол англи дылга база сонуургалдыг. Ол авазының солуттунмас дузалакчызы болу берген, оттулар ыяжын чарар, хөмүр-дажын киирер, суглаар, кажаа-хораазын аштаар дээш шупту ажылдарны кылыр.
Сүт-Хөл кожууннуң өөредилге эргелелиниң төлээзи Эрик Ооржактың чугаазы-биле алырга, байырлалда 19 уруг киржип келген.
Чаа чыл байырлалының шупту киржикчилеринге белектерни үлээн.
