ТР-ниң Дээди Хуралының Даргазы Кан-Оол Даваа Тыва Республиканың Күш-ажылдың Маадыры Өшкү-Саар Ооржак-биле ужурашкан.
– Россияның көдээ ажыл-агыйының алдарлыг ажылдакчызы, Тыва Республиканың Күш-ажылдың Маадыры, арга-дуржулгалыг көдээ ишчи Өшкү-Саар Аракчааевна Ооржак-биле ужураштым.
Бир дугаарында мал оолдаашкынының чорудуун чугаалаштывыс. Мал-маган эки кыштаан-даа болза, час белен эвес болган. Кожа девискээрлерден бɵрүлерниң халдаашкыннары база бо-ла дүвүредип кээр. Хоочунувустуң бо чугаазын хыналдага алдым.
Бүдүрген чүүлдери чүгле Тывада эвес, оон-даа дашкаар билдингир «Мөген-Бүрен» бүдүрүлгениң ажыл-чорудулгазын база чугаалаштывыс. Өшкү-Саар Аракчааевнаның планнары черле бурунгаар көрүштүг кижи – бодунуң экологтуг арыг продукциязын болбаазырадырын көвүдедир, чаа ажыл-агыйжы харылзааларны тургузар дээш оон-даа ɵске. Бо айтырыгларга дузалажырын база кызыдар бис.
Ужуражып келгенивисти ажыглап, тускай шериг операциязының киржикчилерин доктаамал деткип турары дээш хоочунувуска база катап өөрүп четтиргенивисти илереттим.
