ТР-ниң Дээди Хуралының депутаттары ээлчег чок сессия хуралынга ийи айтырыгны көрген.
Тываның Соңгулда комиссиязының кежигүннериниң бирээзи хуусаадан эрте бүрүн-эргезинден дүшкенин барымдаалааш, комиссияның бадылаар эргелиг кежигүнүн томуйлаарының дугайында Дээди Хуралдың доктаалының төлевилелин баштай чугаалажып көрген. Регионалдыг Соңгулда комиссиязының депшиткени ТывКУ-нуң орус дыл болгаш чогаал кафедразының доцентизи Евгений Монгуштуң кандидатуразын депутаттар бир үн-биле деткээннер.
Дараазында Тыва Республиканың Аныяктар Хуралының (парламентизиниң) Дүрүмүнче киирип турар өскерилгелерни деткээн. Өскерилгелер Аныяктар Хуралының составынга болгаш ону тургузарының чурумунга хамааржыр.
Хурал кежигүнү болур эргени тускай шериг операцияга киржип турган улуска, а ол ышкаш шериг азы аңаа деңнээн албанны эрткен хамаатыларга мурнады бээр.
