Кызылдың 15 дугаар «Чаштар делегейи» уруглар садының чаштары «Найырал» фестивалының дээди шаңналының эдилекчилери болганын ТР-ниң Өөредилге яамызы дыңнаткан.
Улусчу чогаадылга бажыңынга Кызылдың уруглар садтарының аразынга болуп эрткен «Найырал» национал культуралар фестивалының түңнел концертинге тергиин көргүзүглерниң тиилекчилерин шаңнаан.
Уруглар садтарының кижизиттирикчилери боттарының көргүзүглеринге аңгы-аңгы нацияларның төлээлериниң: тыва, орус, казах, армян, татар, башкир, грузин, хакас, якут, чечен чоннарның культуразын танцы-сам болгаш шүлүктер-биле көргүскен.
Фестивальдың түңнелдери-биле I чергениң лауреадының дипломунга 21 душаар уруглар садының, II чергениң лауреадының дипломунга 1 дугаар «Алдын дүлгүүр» уруглар садының, III чергениң лауреадының дипломунга 5 дугаар «Рябинка» уруглар садының чаштары төлептиг болган.
I чергениң дипломун 22 дугаар «Хүнчүгеш» биле 19 дугаар уруглар садтары, II чергениң дипломун 29 биле 18 дугаар «Алые паруса» уруглар садтары, III чергениң дипломун 3 биле 17 дугаар «Салгал» уруглар садтары алган.
Дээди шаңналды – Кызылдың 15 дугаар «Чаштар делегейи» уруглар садының чаштары чаалап алган.
«Найырал» фестивалы – дылга, хөгжүмге, оюнга хүндүткелди кижизидип турар болгаш улустарга аңгы-аңгы нацияның база чоннарның, оларның культуразынга сонуургалды оттуруп турар ада-чуртчу байырлалы-дыр.
Дараазында чылын фестивальды регионалдыг деңнелге эрттирерин планнап турар.
