Тываның Баштыңы Владислав Ховалыгның эгелекчи саналы-биле Тывада делегей чергелиг IV сарыг шажын шуулганын белеткеп эрттирер эки турачылар штавын тургузуп, оларны өөредип белеткээр программаны ажылдап кылган.
Штабта регион эрге-чагыргазының, күрүне албан черлериниң, хөй-ниити организацияларының, эки турачылар отрядтарының төлээлери кирген. Штабтың кол сорулгазы – шуулганның киржикчилеринге эң таарымчалыг байдалды тургузары.
Эки турачылар хемчеглерни эрттиржип, аъш-чем алырынга, чурттаарынга база аай-дедир аргыжарынга байдалдарны тургусчур. Штаб ол ышкаш массалыг информация чепсектери-биле кады ажылдап, өөредилгени организастап, эки турачыларны шилижер.
Өөредилге программазы «Алдын-Херелдиң камгалакчылары: Бүгү-делегей чергелиг сарыг шажын эки турачыларның оруу» деп атты алган. Ол чаңгыс демниг команданы тургузуп, эки турачыларны Тываның төөгүзүнүң, культуразының, шажын-чүдүлгезиниң дугайында билиглер-биле чепсеглеп, ол ышкаш даштыкы аалчылар-биле ажылдаарынга херек сарыг шажын этиканың үндезиннеринге болгаш тывынгыр-сагынгыр болурунуң арга-дуржулгаларынга өөредир.
Программада лекциялар, семинарлар, тренингилер, ажыл-агыйжы оюннар, экскурсиялар, бот ажылдар кирип турар. Эки турачыларның алган билиглеринге болгаш тура-чүткүлүнге даянып, сөөлгү шилилгени чорудар.
18-тен 35 харга чедир аныяктар — шуулганның темазынга ханы сонуургалдыг болгаш эки турачылар ажылы дамчыштыр бодунуң өзүлдезинче чүткээн студентилер, тускай мергежилдиглер болгаш соруктуг эки турачылар командазының кол кезээн тургузар. Ол ышкаш 45 хардан өрү назылыг башкылар, эксперттер база эки турачылап, өске-даа чугула ажылдарга дузалажыр.
Программа даштыкы аалчылар-биле ажылдаарынче угланган болгаш, колдуунда орус дылга эртер. Тыва дылды билири күзенчиг, ынчалза-даа ол албан эвес.
Добро.рф шөлчүгешке шуулганның эки турачы программазынга киржир дугайында билдириишкин киирери март 31-де доозулганын сагындыраал. Шуулганга муң ажыг кижи аңаа киржир күзелин илереткени, аңаа улуг сонуургалдың база дуза кадарынга белениниң бадыткалы.
