Эртен, апрель 12-де, Улусчу чогаадылга бажыңынга эртер болуушкун – коллективтиң 2023 чылда кол юбилейлиг хемчээниң бирээзи. Концерттен кирген акша-хөреңги-биле кадыкшылының байдалы-биле харык-шинээ кызыгаарлыг кижилерниң чогаадыкчы шөлүн ажыдарынче киириштирер.
Чурттакчы чоннуң социал хандырылгазының комплекстиг төвүнүң ажылдакчылары ийи он чылдың дургузунда чааскаан чурттап турар назылап кыраан кижилерге база кадыкшылының байдалы-биле харык-шинээ кызыгаарлыг улуска дузалажып, оларның амыдыралын чиигедирин кызып турарлар: бажың ажылынга дузалажып, эмнер база аъш-чемнерин сатчып, эмнелгелер болгаш өске-даа херек черлерже үдеп чедирерлер.
Чоннуң социал камгалалы кошкак кезээ – тодаргай чурттаар чери чок база чаа хосталган кижилерге чаглактаныр черни база чиир чемни берип, документилерин катап кылдырарынга база ажыл тыварынга дузаны көргүзүп турар.
Улусчу чогаадылга бажыңынга эртен 16.00 шакта болур концертче кирери халас. Концерт эгелээр мурнуу чарыында, Улусчу чогаадылга бажыңының фойезинге, кадыкшылының байдалы-биле харык-шинээ кызыгаарлыг болгаш улуг назылыг кижилерниң хол-биле кылган ажылдарының ачы-буян чыылдалыг делгелге-ярмарказы 13.00 шакта эгелээр.
«Деткимче» республика төвүнүң командазы чыгдынган акша-биле «Найысылал» арт-төптүң баазазынга чогаадылга булуңун ажыдып, аңаа кадыкшылының байдалы-биле харык-шинээ кызыгаарлыг улуг, бичии кижилер чаңгыс черге чыглып, хөөрежип, боттарының салым-чаянын ажыдып, мастер-класстарга киржип, арга-дуржулгазын солчурунга эптиг арганы тургузуп бээр планныг.
“Деткимчениң” коллективи бүзүрел телефону таварыштыр социал албан черлеринден тайылбыр алыр арга-дуржулганы 2006 чылда бир-ле дугаар ажыглап эгелээн.
Республикада улуг ужур-дузалыг төлевилелдерни боттандырган: чижээ, «Арголик» турисчи комплексти ажыдып, социал такси албанын база көжүп чоруур консультация пунктузун организастаан.
Берге байдалга таварышкан херээжен чонга салбыр, социал аалчылар бажыңы, тодаргай чурттаар чери база ажыл-агыйы чок кижилерге күш-ажылчы терапия салбыры, чонга херектиг болганын төп бадыткаан. 2012 чылда Тожу кожууннуң Чазылар суурда социал-күш-ажыл реабилитациязының тускай салбырын ажыткан.
Федералдыг база регион программаларынга төп киришкеш, хлеб быжырар черни, даараныр цехти, уругларга психологтуг оожургал өрээлин ажыдып, дерээн.
«Деткимче» республика төвү бөгүнде бажыңынга социал ачы-дузаларын, харык-шинээ кызыгаарлыг кижилерге социал реабилитацияны, тодаргай чурттаар чери чок кижилер-биле ажылдап турар республикада чаңгыс организация болур.
Социал төптүң болгаш ооң азыралында кижилерниң эгелээшкинин деткип, буянныг үүле-херекке кижи бүрүзү киржип болур. «Деткимче» чурттакчы чоннуң социал хандырылгазының республиканың комплекстиг төвү ТР-ниң КБА дараазында агар саннарынче кайы хире-даа түңнүг акшаны шилчидип болур.
Тыва Республиканың Саң-хөө яамызы (ГБУ РТ «Республиканский комплексный центр социального обслуживания населения «Поддержка» л/с 20126Ц49210)
Банк: Отделение - НБ Республика Тыва Банка России// УФК по Республике Тыва, г. Кызыл
Е/с – 03224643930000001200
К/с – 40102810945370000080
