«2024-2028 чылдарда Тываның диш албанын сайзыраңгайжыдары болгаш хөгжүлдези» деп регион программазынче Бай-Тайга кожууннуң төп эмнелгезинде диш эмнээр кабинет киргенин чагырга чери дыңнаткан.
Кожуунда чаңгыс диш эмчизи – Чиңгис Мөге-Хүрен аарыг улусту хүлээп турар. Ол ажылынга бердинген аныяк эмчи. Республиканың диш эмнелгезиниң кол эмчизи Аян Хайжок ажыл-агыйжы сургакчылаашкын үезинде Чингис Мөге-Хүренниң ажылы-биле таныжып, кандыг деткимче-дуза херегин сонуургаан. Диш эмнээр кабинетте дериг-херекселдер чеже-даа эрги болза, аныяк эмчи бай-тайгажыларга шынарлыг ачы-дузаны чедирип турарыy үнелээн.
Диш эмнелгезиниң регионда бар шупту кабинеттерин чаңгыс аай стоматология төвү кылдыр каттыштырып турар. Кожууннуң төп эмнелгезиниң улуг эмчизи Марианна Моге-Хүрен биле диш эмчилери кабинетти ук төпке кадар дугайында айтырыгларны дугуржуп, сүмелешкеннер.
Чаңгыс аай стоматология төвүнге каттышкан соонда, диш эмнээр кабинеттиң курлавырын долузу-биле ажыглап, аарыг кижилерниң диш эмчизинге кирип алырының ээлчээн болгаш хуусаазын кызырар арга тургустунар. Чижээлээрге, диш эмчи шөлээлеп азы аарый бээр болза, ооң орнун солуур эмчини база ол ышкаш херек ужурлуг дериг-херекселдерни чаартыр болгаш эм-таңны төп долузу-биле хандырып бээр.
Диш эмнээр кабинеттерни чаңгыс аай стоматология төвү кылдыр каттыштырганы эмчилерге-даа, дижи аараан кижилерге-даа эптиг таарымчалыын чамдык кожууннар демдеглеп турар.
