Долу эвес мөөңнээшкинче келдирткен 684 хамааты бүрүзүнче 100 муң рубльди шилчиткен

Тывадан шериг албан-хүлээлгелиглерге долу эвес мөөңнээшкин дээш чаңгыс катап бээр төлевирге 68 сая рубльди төлээн. Республикадан мөөңнээшкин-биле шериг албанынче 684 кижи кыйгырткан.

Тываның Чазааның даалгазы езугаар, бир уругга чаңгыс катап бээр 5000 рубль төлевирге дээш дөрт ажыг сая рубльди үндүрген. 427 билдириишкин киирикчилери 820 уругга саң-хөө акшазын алган. Мөөңнээшкинче келдирткен 684 хамааты бүрүзүнче 100 муң рубльди шилчиткен.

Ол ышкаш долу эвес мөөңнээшкинче кыйгырткан хамаатыларның өг-бүлелеринге адрестиг социал дузаны көргүскен. 665 өг-бүлеге аъш-чем аймаан; 630 өг-бүлеге 50 килдиң далганын; 563 өг-бүлеге ийи-ийи шоодай картофельди; 643 өг-бүлеге бир баш шээр малды; 31 өг-бүлеге сиген-ширбиилди; хереглелдиг 565 өг-бүлениң 248-инге үш тонна хөмүрнү; хереглелдиг 394 өг-бүлениң 256-зынга 5 куб одаар ыяшты чедирген.

Уруглар садтарынче олуттарны 50 уругга берген, 284 уругну изиг чем-биле хандырган. «Кады бис» #МыВместе шимчээшкинниң эки турачылары ыяш, хөмүр-даш белеткээринге, бажыңнарынга бичии септелге кылыр адрестиг дузаны көргүзүп турар.

Республиканың муниципалдыг тургузуглар чагырга черлери, юридиктиг черлер база хуу кижилерниң киржилгези-биле, шериг кижиге чугула херек чүүлдер кирген шоодайлар чыып бээрин организастаан. Тываның Психологтар ассоциациязы өг-бүлелерге психологтуг дуза айтырыгларының талазы-биле кады ажылдаар керээни чарган.

Долу эвес мөөңнээшкинче келдирткен хамаатыларга база оларның өг-бүлелеринге сайгарлыкчылар, хөй-ниити организациялары база хуу кижилер беш ажыг сая рубльге ачы-дузаны чыгган.

Шериг албан-хүлээлгелиглерниң өг-бүлезинге дузаламчы айтырглары тургустунуп келзе, дараазында адресте республиканың чаңгыс аай штавынлан айтырар: Кызыл хоорай, Кочетов кудумчузу, б. 155., тел.: 2-17-44.

Тывадан мөөңнээшкинче кыйгыртканнарның өг-бүлелеринге дуза кадар штавы хөй-ниити организацияларының, политиктиг партияларның, күш-ажылчы коллективтерниң база күрүне болгаш болгаш тус чер бот-башкарылга органарының ажылын мөөңнеп, “чаңгыс соңгага” ажылдаар кылдыр таарыштырган.