Чылдың эртер «Эң-не тергиин юридиктиг команда-2024» мөөрейи болуп эрткенин ТР-ниң Дээди Судунуң кеземче херектериниң талазы-биле суд коллегиязының даргазы Хээлиг Тулуш дыңнаткан.
Тываның суд системазының, Росдаңзы, Росчетки, Иштики херектер яамызының, Россияның Кеземче күүселдезиниң федералдыг албанының республикада эргелелиниң, үндүрүг, монополияга удур, болчукчулар, кадык камгалал болгаш оон-даа өске албан черлериниң 15 командазы ук атка төлептиг болур дээш киришкен.
Юридиктиг квест-оюн дөрт чадага болуп эрткен. Командаларның кежигүннери хоойлу-дүрүм даалгаларын күүседип, юридиктиг айтырыгларга харыылап турда, үш шак билдиртпейн эрте берген.
Киржикчилер сан бүрүзү дээш изиг-изиг демисешкеннер. Түңнелинде эрткен чылгы мөөрейниң тиилекчилери – ТР-ниң Дээди Судунуң «Лидер» командазы шылгарап үнгеш, бирги черге төлептиг болган.
Ийиги, үшкү черлерни ТР-ниң Болчукчулар палатазы биле Дээди судтуң командары тус-тузунда үлешкен.
Россия Федерациязының Конституциязының база юрист хүннериниң бүдүүзүнде киржикчи бүрүзү боттарының билиглерин хынап, чаа идеялары-биле солчуп, ажыктыг болгаш солун хемчегге киришкеннер.
