Тыва дылды деткиириниң болгаш хөгжүдериниң 2024-2033 чылдарда эчис сорулгазының төлевилелин сайгарып чугаалажыр талазы-биле ажылчын хурал Тыва Республиканың Дээди Хуралынга болуп эрткен.
Хуралдың ажылын ТР-ниң Дээди Хуралының өөредилге, культура, аныяктар политиказының болгаш спорт талазы-биле комитединиң даргазы Аяна Моңгуш башкарып эрттирген. Аңаа дыл эртемденнери, тыва дыл болгаш чогаал башкылары, Дээди Хуралдың депутаттары, тыва дылды деткиириниң болгаш хөгжүдери-биле ажылы холбаалыг ажылдакчылар киришкен.
Тываның гуманитарлыг шинчилелдер институдунуң дыл секторунуң эргелекчизи, филология эртемнериниң доктору Байлак Ооржак Тыва дылды деткиириниң болгаш хөгжүдериниң 2024-2033 чылдарда эчис сорулгазының төлевилели-биле таныштырган.
Ажылчын хуралга сайгарылга үезинде Тыва дылды деткиириниң болгаш хөгжүдериниң 2024-2033 чылдарда эчис сорулгазының төлевилелинде чедер-четпес чүүлдер илереп келген.
Филология эртемнериниң доктору Каадыр-оол Бичелдей, Дээди Хуралдың өөредилге, культура, аныяктар политиказының болгаш спорт талазы-биле комитединиң даргазы Аяна Моңгуш болгаш өскелерниң-даа саналы-биле төлевилелди ажылдап кылырын ам-даа уламчылаар, катап сайгарып көөр шиитпирни ажылчын хуралдың киржикчилери хүлээп алган.
Депутат Аяна Монгуш тыва улустуң «Демниг сааскан теве тудуп чиир» деп үлегер чугаазында дег, демнежииринче кыйгырган.
– Дыл дээрге чоннуң үндезини. Дыл барда – чон бар. Улуг-биче чоннар кады капсырлажып чурттап чоруур улуг күрүне иштинге биче буурай чоннарның дылдарының айтрыглары нарын болуп турар деп билир бис. Ынчангаш «2024-2033» чылдарда тыва дылды деткиириниң болгаш хөгжүдериниң угланыышкыннары" деп саавырның төлевилелин Тываның Чазааның даалгазы-биле доктааткан Күрүне комиссиязы ажылдап кылган.
Тыва төпке үш дугаар салбырның ажылынга кириштим. Тыва литературлуг дылы кадагалап сайзырадыры, дараазында салгалдарга арттырып дамчыдары, хүн бүрүде ажыглап кадагалаарының дугайында сорулгалар салдынган.
Кижи бүрүзү бодунуң үлүг-хуузун киириштирери чугула. Шупту чүүл өг-бүледен эгелээр, ону уттуп болбас. Башкылар, кожаларывыс, эш-өөрүвүс болгаш албан черинде ажылдап чоруур ажылдакчылар төрээн дылы дээш сагыш аарып, ажыглап чоруур болза дылывыс улам быжыгар. Чүгле өөредилге салбырынче көрүп алгаш олурбас болза эки, ындыг ажылды чаңгыс башкы күш четпес.
Демниг сааскан теве тудуп чиир! Демнежиилиңер! – деп, ол соцчеткилерде бижээн.
