Туранның Марк Оюн аттыг культура болгаш дыштанылга төвүнге Бии-Хемниң херээженнер чөвүлелдериниң идепкейжилериниң шуулганы болуп эрткенин чагырга чери дыңнаткан.
Шуулганны Тывада Хөй ажы-төлдүг өг-бүлелер хүнүнге, Тургузукчу күш-ажылдың болгаш өг-бүле ыдыктарының база Россияда чоннарның чаңгыс деминиң чылынга тураскаадып эрттирген.
Тываның хамааты байдалдың актылар бижидилгезиниң Бии-Хемде эргелелиниң удуртулгазы кожууннуң хөй-ниитижи болгаш идепкейжи хөй ажы-төлдүг өг-бүлелерин хүндүткеп байырлаан.
Эдектиг тон – өг-бүлелиг тыва херээжен кижиниң чаңчылчаан хеви. Даарап каан тон – өг-бүлениң одаанга чолдуг эдилел, төрел аймактың байлааның болгаш ие болурунуң демдээ.
Елена Байкараның эрттирген «Эдектиг тон» марафонунга тоннар даарап алган херээжен улус боттарының ажылын сцена кырынга бараалгаткан.
Эдектиг тон дааракчызы Кежикей Шарый-оол тонну даарап тургаш йөрээлдер, чаагай күзээшкиннер чугаалаар чаңчылды, пөс-таавы шилилгезин, дааранырының аргаларын, быжар элементилерниң ыдыктыг ужур-утказын таныштырган.
Кожууннуң төп ном саңы тыва улустуӊ оюну – кажыкты ойнаткан, Бий-Хемниң аныяктар төвү база Туранның уругларның уран чүүл школазы делгелгени бараалгаткан.
Бии-Хем кожуун чагыргазының, херээжээннер чөвүлелиниң, Тываның хамааты байдалдың актылар бижидилгезиниң тус черде эргелелиниң удуртулгазы чаңчылдарны кадагалап – өг-бүлелерни быжыглаар шуулганны бедик деңнелге эрттирген.
Эрткен чылын Тываның Баштыңы Владислав Ховалыгның саналы-биле тургустунган байырлал — Хөй ажы-төлдүг өг-бүлелер хүнүн Тыва сентябрь 19-та демдеглээрин сагындыраал.
Чылдың-на сентябрьның үшкү субботазында эртип турар ол байырлал өг-бүлениң, ада-иениң онзагай ролюн, хөй ажы-төлдү кижизидериниң чаңчылдарын көргүзер сорулгалыг.
