Бөгүн Улусчу фронтунуң ачы-дуза чыыр пунктузунче Роскомхайгааралдың Енисей эргелелиниң Кызылда салбыры, Россияның Онза байдалдар яамызының Тывада Кол эргелелиниң дилеп-тывар отряды генераторларны, Тываның гуманитарлыг болгаш тускай социал-экономиктиг шинчилелдер институду дайынчыларга эргежок херек чажыртынып шыптынар четкилерни дамчыткан.
Роскомхайгааралдың Енисей эргелелиниң Кызылда салбырының удуртукчузу Руслан Монгуштуң чугаалап турары-биле алырга, оларның дамчыдып турар генератору шимээн чок ажылдаар болгаш дайынчы хөделиишкиннер девискээринде чоруп турар шериглерге дыка тааржыр. Олар мооң мурнунда УАЗ “Патриот” маркалыг автомашинаны, акша-төгерикти чыып, дайынчыларга чылыг идик-хеп, аъш-чем дээш оон-даа өске херектиг чүүлдерни дамчыдып турган.
“Удавас Ада-чурттуң Улуг дайынынга Тиилелгениң 80 чыл оюн демдеглээр бис. Бо удаада Онза байдалдар яамызының камгалакчыларының мурнундан бензин-биле ажылдаар генераторларны дамчыдып тур бис. Ооң ачызында дайынчыларывыс рацияларын болгаш өске-даа техниктиг херекселдерин октап алыр. Дайынчы оолдарывыска болгаш оларның өг-бүлелеринге доктаамал ачы-дузаны көргүзүп турар бис. Тускай шериг операциязында киржип турар чаңгыс чер чурттугларывысты деткиирин ажыл уламчылаар” – деп, ийиги класстың камгалакчызы Шолбан Байкара чугаалаан.
Тываның гуманитарлыг болгаш тускай социал-экономиктиг шинчилелдер институдунуң ажылдакчылары 3х6 хемчээлдиг чажыртынып шыптынар четкини дамчыткан. Институттуң библиотекары Чечена Норбунуң чугаазы-биле алырга, эртемденнер хостуг үезинде “чажыртынар” четкилерни кылып турар.
Үстүнде ады кирген албан черлери ачы-дуза чедирилгелериниң болгаш акцияларның доктаамал киржикчилери.
Ачы-дуза чыылдазы апрель 28-ке чедир уламчылаар. Тускай шериг операциязында киржип турар дайынчыларга ачы-дуза чыыр пункт дараазында адресте ажылдап турар: Кызыл хоорай, Тыва эки турачылар кудумчузу, 3. Харылзажыр телефону: 2-10-50.
Чуруктарны Буян Ооржак тырттырган
