Тывада культура инфратургузуун сайзырадыр «Сорунза» төлевилелдиң амыдыралда боттанылгазын уламчылап турар.
Төлевилелдиң чорудуу-биле республиканың биче суурларында амгы үениң негелдеринге дүүштүр көдээ культура бажыңнарын туттунуп, тус черниң чурттакчыларының культура-дыштанылга төптери болу берген.
2025 чылда Бай-Тайга кожууннуң Ээр-Хавак сумузунга культура бажыңын ажыдары планнаттынган. Тус черниң чурттакчыларының дилээн Тываның Баштыңы Владислав Ховалыг деткээн.
Ээр-Хавактың чагырга чери оран-сава тудар черни аңгылаар шиитпирни хүлээп алган. ТР-ниң Культура яамызы объектиниң таваан салыр тудуг материалдары-биле хандырган. Ээр-хавакчыларның, чагырга база культура ажылдакчыларының күжү-биле келир үениң культура одааның таваан салып дооскан.
«Сорунза» төлевилелдиң культура бажыңнарын чаңгыс дөзевилел хевири-биле тудуп, республика бюджединден акшаландырып турар. Кожуун чагырга черлери тус черниң ажылдакчыларын ажылче хаара тудары-биле деткимчезин көргүзер.
