Ээзи чок ыттарга ызырткан дугайында дыңнадыглар саны эвээжээн

Кызыл хоорайның калчаа аарыы-биле таарымча чок девискээринде кирген алды муң үш чүс хире өрегеге ветеринария албанының тускай мергежилдиглери четкен.

Тываның Чазак Даргазының агроүлетпүр комплекизиниң ажыл-чорудулгазын удуртуп-хайгаараар оралакчызы Уран-оол Ондар аппарат хуралынга эпизоотиктиг халдавырга чоок айыылдыг девискээрде чурттап турар хууда секторнуң бүгү чурттакчы чонун хаара туткан деп дыңнаткан. Чурттакчы чонга калчаа аарыының дугайында хуудустарны тарадып, информация-чырыдыышкын ажылын чоруткан.

Хоорайның эрге-чагыргазы найысылалда чедимчелиг эвес черлерде черлик ыттарны турар ажыды хүн бүрүде чорудуп турар, ынчалза-даа ытка ызырткаш эмчи дузазын дилеп кээп турар кижилер ам-даа бар. Ындыг болзажок, ыттар халдаан таварылгалар саны эвээжээни демдеглеттинген.

Росхереглелхайгааралдың Тыва Республика талазы-биле эргелелиниң удуртукчузу Людмила Салчактың дыңнатканы болза, ындыг дыңнадыглар 41 хуу эвээжээн. Беш чагырга чериниң девискээрлеринге ытка ызырткан таварылгаларны демдеглээн: Кызыл хоорайда 12, Кызыл кожуунда 4, Ак-Довурак хоорайда 2, Барыын-Хемчик биле Улуг-Хем кожууннарда 1-1.

Эрткен чылдың ол-ла үезинге деңнээрге 9,2 хуу эвээшке, азы 100 муң чурттакчыга онааштыр 5,9 кижи калчаа аарынга удур дуза дилеп келгени демдеглеттинген. Байдал чүгээртээн-даа болза, хоорайда байдал нарын, дириг амытаннардан аарыгның тарап болуру улуг дээрзин эпидемиологтар дыңнаткан. Хоорайга айыылдыг аарыгның тараарын болдурбас, найысылал чурттакчыларының амы-тынынга база кадыкшылынга айыыл чок чоруктуң чугула хемчеглерин алыр ажылды уламчылаарын Уран-оол Ондар негээн.

Кызыл хоорайның төп кезээнге туткан үш черлик ыттан калчаа аарыы бадыткаттынганын сагындыраал. Бо хүнге чедир аараан чаа таварылгалар илереттинмээн. Ындыг болзажок, аарыгны узуткаар ажылга шупту албан черлери киржиринге белен. Халдавырның эге чадазы организмге элээн каш айларда билдинмейн чоруур болганындан, аарыг дириг амытан элээн каш үеде билдинмейн чоруур деп эксперттер санап турар.